افطار پارٹیوں پر پابندی کا مطالبہ ، تنقید کے بعد کنگنا نے ٹوئٹ ڈیلیٹ کر دی

بالی ووڈ اداکارہ کنگنا رناوت نے بھارتی وزیراعظم نریندر مودی سے رمضان المبارک میں افطار پارٹیوں اور دیگر اجتماعات پر پابندی عائد کرنے کا مطالبہ کردیا۔

باغی ٹی وی : کنگنا رناوت وہ بھارتی اداکارہ ہیں جو مسلمانوں اور پاکستان کے خلاف زہر اگلنے کا کوئی موقع ہاتھ سے جانے نہیں دیتیں۔ بات چاہے کوئی بھی ہو مسلمانوں اور پاکستان کو زبردستی اس بات میں گھسیٹ لاتی ہیں تاہم اب پھر کورونا کی آڑ میں مسلمانوں سے دشمنی نکالنے کا موقع ہاتھ سے نہیں جانے دیا اور اس بار رمضان میں افطار پارٹیوں پر پابندی لگانے کے مطالبے پر ٹوئٹ کرکے بہت سے لوگوں کو ٹھیس پہنچائی ہے۔

بھارتی میڈیا کے مطابق گزشتہ روز کنگنا رناوت نے وزیراعظم نریندر مودی سے ٹوئٹر پراپنے ٹوئٹ میں درخواست کی ’پرائم منسٹر جی براہ مہربانی رمضان میں اجتماعات (افطار پارٹیوں) پر پابندی لگائی جائے۔

کنگنا کو اس ٹوئٹ پر صارفین کی جانب سے شدید تنقید کا سامنا کرنا پڑا یہاں تک کہ تنقید کے بعد اداکارہ نے اپنا یہ ٹوئٹ ڈیلیٹ کردیا۔ لیکن ٹوئٹ کا اسکرین شاٹ وائرل ہوگیا ہے۔

کنگنا رناوت کا یہ ٹوئٹ اس وقت سامنے آیا جب نریندر مودی نے ملک میں بڑھتے کورونا کیسز کی وجہ سے بھارت میں جاری کمبھ میلے کو ختم کرنے کی اپیل کی تھی۔

میڈیا رپورٹس کے مطابق کمبھ میلے کے دوران 30 سادھوؤں کا کورونا ٹیسٹ مثبت آیا تھا جس کے بعد مودی نے ٹوئٹ کرتے ہوئے کہا میں نے فون پر اچاریا مہا منڈلیشور، پوجیا سوامی اوادھیشانند گری جی اور جونا اکھارا سے بات کی اور تمام سادھوؤں کی صحت کے بارے میں پوچھا۔ تمام سادھوؤں کو انتظامیہ ہر طرح کا تعاون فراہم کررہی ہے۔

ایک اور ٹوئٹ میں مودی نے کہا کورونا کے بڑھتے کیسز کی وجہ سے کمبھ میلے کو ختم کیا جائے اس طرح اس بحران کے خلاف جنگ جیتنے میں طاقت ملے گی۔

اس ٹوئٹ کے بعد کنگنا رناوت نے ٹوئٹ کی کہ کمبھ میلے کے بعد رمضان میں ہونے والے اجتماعات پر بھی پابندی عائد کی جائے۔