ڈاکٹرغلام مصطفی بڈانی
اوچ شریف (باغی ٹی وی، نامہ نگار حبیب خان) احمد پور شرقیہ میں واقع کچہری روڈ پر ریسٹ ہاؤس گیٹ کے بالمقابل فائرنگ کا افسوسناک واقعہ پیش آیا جس کے نتیجے میں 50 سالہ طالب حسین شدید زخمی ہو گئے۔ ابتدائی اطلاعات کے مطابق یہ واقعہ سابقہ دشمنی کا شاخسانہ معلوم ہوتا ہے۔
ذرائع کے مطابق احمد پور کھوہنہ کے رہائشی طالب حسین موٹر سائیکل پر سوار کہیں جا رہے تھے کہ اسی دوران حافظ فیاض کے بیٹے محمد کیف، محمد اسامہ اور ان کے تین دیگر ساتھیوں نے ان کا راستہ روک لیا۔ محمد کیف نے اس موقع پر طالب حسین پر فائرنگ کر دی، جس کے نتیجے میں دو گولیاں ان کی دائیں ٹانگ پر لگیں اور وہ بری طرح زخمی ہو گئے۔
واقعے کی اطلاع پر تھانہ سٹی پولیس موقع پر پہنچی اور زخمی طالب حسین کو فوری طور پر تحصیل ہیڈ کوارٹر ہسپتال (ٹی ایچ کیو) احمد پور ایسٹ منتقل کیا گیا۔ ذرائع کا کہنا ہے کہ دونوں فریقین کے درمیان رنجش اُس وقت شروع ہوئی جب حافظ فیاض ایک مذہبی اجتماع کے دوران دل کا دورہ پڑنے سے جاں بحق ہو گئے تھے، جس پر ان کے بیٹوں نے طالب حسین سمیت دیگر افراد پر الزامات لگا کر مقدمہ درج کرایا تھا، تاہم عدالت نے طالب حسین کو طبی بنیادوں پر بری کر دیا تھا۔
پولیس نے واقعہ کا مقدمہ درج کر کے تفتیش کا آغاز کر دیا ہے جبکہ ملزمان کی گرفتاری کے لیے مختلف مقامات پر چھاپے مارے جا رہے ہیں۔ فائرنگ کے اس واقعے کے بعد علاقے میں خوف و ہراس پھیل گیا ہے اور شہریوں نے مطالبہ کیا ہے کہ ملزمان کو جلد از جلد گرفتار کر کے قانون کے کٹہرے میں لایا جائے۔
