ممبئی: بھارتی قومی ائیر لائن ائیر انڈیا کی لندن سے ممبئی آنے والی پرواز ایک بار پھر خبروں کی زینت بن گئی ہے، جب جہاز میں سوار سات افراد، جن میں دو کریو ممبرز بھی شامل ہیں، اچانک ایک جیسی بیماری کی لپیٹ میں آ گئے۔
بھارتی میڈیا رپورٹس کے مطابق، دوران پرواز ان افراد نے شدید پیٹ درد، چکر آنا اور متلی جیسی علامات ظاہر کیں، جس سے فضائی عملے میں ہنگامی صورتحال پیدا ہو گئی۔ تاہم، فلائٹ کو بحفاظت اپنی منزل پر اتارنے میں کامیابی حاصل ہوئی۔ٹائمز آف انڈیا کی رپورٹ میں فضائی عملے نے بتایا کہ دوران سفر جب سات افراد کو اچانک یہ علامات محسوس ہوئیں تو عملے نے فوری طور پر ایمرجنسی پروٹوکول کا نفاذ کیا اور جہاز کی لینڈنگ کے فوراً بعد متاثرہ مسافروں کو طبی امداد فراہم کی گئی۔ائیر انڈیا کے ترجمان نے واقعے پر جاری کردہ بیان میں کہا ہے کہ پرواز میں مسافروں کی اچانک بیماری کی وجوہات جاننے کے لیے تحقیقات جاری ہیں اور ابھی تک کوئی حتمی نتیجہ نہیں نکالا جا سکا۔
بھارتی ذرائع ابلاغ کے مطابق، کیبن ڈپریشن یعنی جہاز کے کیبن میں آکسیجن کی کم سطح کو اس بیماری کی سب سے بڑی وجہ سمجھا جا رہا ہے۔ ایسے حالات میں مسافروں کو چکر آنا، متلی اور پیٹ درد جیسی علامات ہو سکتی ہیں۔ تاہم بعض ذرائع کا کہنا ہے کہ کیبن میں آکسیجن کی سطح نارمل تھی، جس کے باعث فوڈ پوائزننگ کو بھی بیماری کی ایک ممکنہ وجہ قرار دیا جا رہا ہے۔
