کراچی:اسکائی ونگز ایوی ایشن کمپنی نے ایک بیان میں کہا کہ ایدھی کا ایئر ایمبولینس آپریشن ہوا بازی کی ان متعدد عمومی سرگرمیوں میں سے ایک ہے جو جیٹ فیول کی شدید قلت کی وجہ سے روک دی گئی ہیں۔
اسکائی ونگز ایوی ایشن کمپنی کےاہم ذمہ دارعمران اسلم خان کے مطابق پائلٹوں کو تربیت دینے میں مہارت رکھنے والی اسکائی ونگز ایوی ایشن کمپنی نے کہا کہ ایدھی کی ایئر ایمبولینس کی پرواز معطل کرنے سے انتہائی ضروری نوعیت کی طبی امداد میں رکاوٹ آئے گی۔کمپنی نے دعویٰ کیا کہ اسٹیٹ بینک دسمبر 2022 سے کراچی کے پورٹ قاسم پر پھنسے جیٹ فیول کے لیے لیٹر آف کریڈٹ (ایل سیز) کھولنے میں تاحال ناکام ہے۔
ایوی ایشن کمپنی نے مزید کہا کہ ایندھن کی ادائیگی کے لیے درکار 23 ہزارڈالر پہلے ہی کمرشل بینک میں جمع کرادیے گئے تھے لیکن اس نے انتقامی کارروائیوں کے خدشے پر مرکزی بینک کے ساتھ اس معاملہ کو طے نہیں کیا۔
کمپنی نے مزید کہا کہ ’ہم نے ایندھن کی کمی کی وجہ سے بہت سی ہنگامی طبی پروازوں کی درخواستوں کو مسترد کر دیا ہے‘۔حکومت سے مدد کی درخواست کرتے ہوئے کمپنی نے کہا کہ ملک میں پہلے سے پہنچ چکے ایندھن پر ڈیمریجز (تاخیر کا ہرجانہ) جمع ہوتا جارہا ہے۔
