علی پور :شہر کے متعدد علاقے گندے پانی میں ڈوب گئے،شہری اذیت میں مبتلا

اوچ شریف (باغی ٹی وی نامہ نگارحبیب خان ) علی پورشہر کے متعدد علاقے گندے پانی میں ڈوب گئے،شہری اذیت میں مبتلا

تفصیل کے مطابق علی پور شہر کے متعدد علاقے گندے پانی کی وجہ سے شدید آلودہ ہو چکے ہیں۔ مسلم کالونی، خیر پور چوک، پرانی تحصیل، کالج روڈ، میونسپل کمیٹی کا داخلی دروازہ، چھوٹا گراونڈ، محلہ مستوئیاں، گلی ڈاکٹر عرفان والی، القادر کالونی، سادات کالونی جیسے اہم علاقوں کی نالیاں اور گلیاں پوری طرح گندے پانی سے بھری ہوئی ہیں۔

اس صورتحال کی وجہ سے شہریوں کو گھر سے باہر نکلنے میں شدید مشکلات کا سامنا ہے۔ بدبو اور بیماریوں کا پھیلاؤ بھی ایک بڑا مسئلہ بن چکا ہے۔ شہریوں نے بتایا کہ اسسٹنٹ کمشنر اور چیف آفیسر علی پور کے سیوریج کی بہتری کے دعوے محض دعوے ہی رہ گئے ہیں۔

شہریوں نے کمشنر ڈیرہ غازی خان اور چیف سیکریٹری پنجاب سے نوٹس لیتے ہوئے اس مسئلے کا فوری حل نکالنے کا مطالبہ کیا ہے۔ انہوں نے کہا کہ اگر جلد از جلد اس مسئلے کا حل نہ نکالا گیا تو وہ احتجاج کرنے پر مجبور ہوں گے۔