ڈاکٹرغلام مصطفی بڈانی
علی پور (باغی ٹی وی رپورٹ) ضلع مظفر گڑھ کی تحصیل علی پور میں تھانہ خیر پور سادات کی حدود موضع ٹھل مینگراج میں ایک افسوسناک واقعہ پیش آیا، جہاں شادی کی رات دولہا محمد شاہد کو بے دردی سے قتل کر دیا گیا۔ نامعلوم ملزمان نے گلہ گھونٹ کر دولہا کو موت کے گھاٹ اتارا اور اس کی لاش جنگل میں پھینک کر فرار ہو گئے۔
واقعے کی اطلاع ملتے ہی ایس ایچ او خیر پور سادات نور خان بھاری پولیس نفری کے ہمراہ موقع پر پہنچے اور شواہد اکٹھے کیے۔ لاش کو ضروری کارروائی کے لیے ہسپتال منتقل کر دیا گیا ہے۔ ایس ایچ او نور خان نے کہا کہ قتل کی تحقیقات جاری ہیں اور بہت جلد ملزمان کو گرفتار کرکے قانون کے کٹہرے میں لایا جائے گا۔
اس لرزہ خیز واقعے نے علاقے میں خوف و ہراس پیدا کر دیا ہے، جبکہ مقتول کے اہل خانہ شدید غم سے نڈھال ہیں۔ اہل علاقہ نے حکومت اور انتظامیہ سے قاتلوں کی فوری گرفتاری اور سخت سزا کا مطالبہ کیا ہے۔
یاد رہے کہ مقتول دولہا محمد شاہد ولد مختیار قوم بھٹی تھانہ کندائی کی حدود کا رہائشی تھا جبکہ اس کی لاش تھانہ خیر پور سادات کی حدود میں برآمد ہوئی۔ پولیس کی جانب سے واقعے کی تحقیقات تیزی سے جاری ہیں اور جلد پیش رفت متوقع ہے۔
