لاہور: مشہور ڈرامہ نگار خلیل الرحمان قمر کے ہنی ٹریپ اور اغوا برائے تاوان کیس کی سماعت انسداد دہشتگردی عدالت میں ہوئی۔
کیس میں ملزمہ آمنہ عروج، حسن شاہ اور دیگر 12 ملزمان کی موجودگی میں آج سماعت ہوئی۔آمنہ عروج اور حسن شاہ سمیت دیگر ملزمان کو جیل سے عدالت میں پیش کیا گیا جہاں عدالت میں مدعی مقدمہ خلیل الرحمان قمر بطور گواہ پیش ہوئے۔ دوران سماعت، ملزمان کے وکلاء نے خلیل الرحمان قمر کے بیان پر جرح کی، جبکہ تمام ملزمان کے وکلاء نے الگ الگ بیانات پر جرح کی۔خلیل الرحمان قمر نے عدالت میں اپنے بیان میں کہا کہ ملزمہ آمنہ عروج نے دھوکہ دہی سے انہیں اپنے فلیٹ پر بلایا اور وہاں پر انہیں اغوا کر لیا گیا۔ انہوں نے یہ بھی کہا کہ ملزمان نے ان سے ایک کروڑ روپے تاوان کا مطالبہ کیا۔
سماعت کے دوران دیگر گواہان کی شہادتیں بھی ریکارڈ کی جا چکی ہیں، جنہوں نے ملزمان کے اغوا اور تاوان کے مطالبے کی تصدیق کی۔عدالت نے کیس کی مزید سماعت کل تک ملتوی کر دی ہے، اور کل آخری گواہ، تفتیشی افسر عمران یوسف کے بیان پر جرح کی جائے گی۔
لاہور ہائیکورٹ نے اس کیس کا جلد فیصلہ کرنے کا حکم دے رکھا ہے، اور انسداد دہشتگردی عدالت کے جج ارشد جاوید نے کیس پر سماعت کی۔
