امریکہ کا پاکستان کے ساتھ تعاون کا عزم، دہشت گردی سے مشترکہ مقابلہ پر زور

امریکی محکمہ خارجہ کے ترجمان میتھیو ملر نے حالیہ بیان میں پاکستان کے ساتھ تعلقات کی اہمیت پر روشنی ڈالی ہے۔ واشنگٹن میں منعقدہ پریس بریفنگ کے دوران، ملر نے کہا کہ پاکستانی عوام نے انتہا پسندی اور دہشت گردی کے باعث شدید نقصان اٹھایا ہے۔میتیھو ملر نے علاقائی سلامتی کے مسائل پر پاکستان کے ساتھ مشترکہ مفادات کا ذکر کرتے ہوئے کہا کہ دونوں ممالک اس چیلنج سے نمٹنے کے لیے مل کر کام کر رہے ہیں۔ انہوں نے افغان طالبان پر زور دینے کی ضرورت پر بھی بات کی تاکہ وہ اپنی سرزمین سے دہشت گرد حملوں کو روکنے کی ذمہ داری لیں۔
امریکی حکام نے پاکستان کو "قریبی پارٹنر” قرار دیتے ہوئے دونوں ممالک کے درمیان وسیع تعاون کا ذکر کیا۔ خاص طور پر، ملر نے پاکستانی معیشت کی بہتری کے لیے جاری کوششوں کا حوالہ دیا، جس میں آئی ایم ایف کی امداد اور اقتصادی اصلاحات شامل ہیں۔یہ بیانات امریکہ کی جانب سے پاکستان کے ساتھ مضبوط تعلقات کی خواہش کو ظاہر کرتے ہیں، خاص طور پر علاقائی سلامتی اور معاشی استحکام کے شعبوں میں۔ دونوں ممالک کے درمیان تعاون کی یہ تجدید خطے میں امن و استحکام کے فروغ کے لیے اہم قدم سمجھی جا رہی ہے