امریکا پاکستان کی سب سے بڑی برآمدی منڈی، امریکی سفیر ڈونلڈ بلوم

پاکستان میں متعین امریکی سفیر ڈونلڈ آرمن بلوم نے کہا ہے کہ امریکا عالمی سطح پر پاکستان کی سب سے بڑی برآمدی منڈی ہے، اور گزشتہ دہائی میں امریکا کو پاکستان کی برآمدات دوگنا سے زیادہ ہو گئی ہیں۔ انہوں نے یہ بات سیالکوٹ چیمبر آف کامرس میں خطاب کے دوران کہی۔سفیر بلوم نے مزید کہا کہ امریکا پاکستان کی مکمل اقتصادی صلاحیت کی بحالی میں مدد فراہم کر رہا ہے۔ ان کا کہنا تھا کہ 80 سے زائد امریکی کمپنیاں پاکستان میں ایک لاکھ 20 ہزار افراد کو ملازمت فراہم کرتی ہیں، جبکہ یہ کمپنیاں بالواسطہ طور پر 10 لاکھ پاکستانی کارکنوں کی زندگیوں میں بہتری لاتی ہیں۔
ڈونلڈ بلوم نے بتایا کہ امریکی حکومت پاکستانی پالیسی سازوں کے ساتھ سرمایہ کاری کی ترغیب دینے کے لیے بات چیت جاری رکھے ہوئے ہے۔ انہوں نے کہا کہ امریکا پاکستانی نوجوانوں کے لیے تعلیمی مواقع بڑھانے کے لیے بھی فنڈز فراہم کر رہا ہے، اور سالانہ 20 ملین ڈالر سے زیادہ کی رقم پاکستانی طلبہ کے لیے مفت تعلیمی تبادلوں میں خرچ کی جا رہی ہے۔امریکی سفیر نے اس بات پر بھی روشنی ڈالی کہ پاکستان میں غذائی قلت کا بحران لاکھوں بچوں کے مستقبل کو خطرے میں ڈال رہا ہے۔ 2022 کے سیلاب کے بعد غذائی قلت سے نمٹنے کے لیے امریکا نے تقریباً 100 ملین ڈالر کی امداد فراہم کی۔انہوں نے مزید کہا کہ پاکستان میں توانائی، پانی اور زراعت کے شعبوں میں اعلیٰ تعلیم کے لیے 4 مراکز بھی قائم کیے گئے ہیں۔ سفیر بلوم نے یہ واضح کیا کہ امریکا اور پاکستان کے درمیان تعلقات اہم اور دیرپا ہیں۔