اے این ایف کی ملک بھر میں کارروائیاں جاری،بیرون ملک منشیات اسمگلنگ کی کوششیں ناکام

اسلام آباد: اینٹی نارکوٹکس فورس (اے این ایف) کی کارروائیاں ملک بھر میں جاری ،اسلام آباد اور پشاورسے بیرون ملک منشیات اسمگلنگ کی کوششیں ناکام بنا دیں۔

باغی ٹی وی: ترجمان اے این ایف کے مطابق اس سلسلے میں اسلام آباد انٹرنیشنل ائرپورٹ سے فلائٹ نمبر کیو آر 633 کے ذریعے دوحہ جانے والے خیبر کے رہائشی ملزم سے 2 کلو 108 گرام آئس برآمد کرلی گئی، جو سوٹ کیس میں چھپائی گئی تھی۔

اسلام آباد موٹر وے کے قریب کار سے 56 کلو 400 گرام چرس اور 8 کلو 400 گرام افیون برآمد کرکے سیالکوٹ کے رہائشی 4 ملزمان کو گرفتار کرلیا گیا-

دوسری جانب باچا خان انٹرنیشنل ائرپورٹ پشاور پر اے این ایف اور اے ایس ایف کی مشترکہ کارروائی میں فلائٹ نمبر پی کے 217 کے ذریعے ابوظبی جانے والے ملزم سے 123 گرام چرس برآمد کرلی گئی، جسے جوتوں میں چھپایا گیا تھا۔

اینٹی نارکوٹکس فورس نے تمام کارروائیوں میں گرفتار کیے گئے ملزمان کے خلاف انسداد منشیات ایکٹ کے تحت مقدمات درج کرکے تفتیش شروع کردی ہے۔