اوچ شریف(باغی ٹی وی،نامہ نگارحبیب خان) احمد پور شرقیہ کے علاقے میں ایک افسوسناک حادثہ پیش آیا، جہاں ایک ٹریکٹر ٹرالی کی ٹکر سے ایک شخص جاں بحق ہو گیا۔ حادثے کے بعد ٹریکٹر کا ڈرائیور موقع سے فرار ہو گیا۔
یہ واقعہ کندے والا پل، ہیڈ راجکاں روڈ پر پیش آیا، جہاں 40 سالہ بیپلا رام ولد لکھو رام، جو کہ چک نمبر 101/DN کا رہائشی تھا، پیدل چل رہا تھا کہ ایک نامعلوم ٹریکٹر ٹرالی نے اسے کچل دیا۔ ریسکیو ذرائع کے مطابق، بیپلا رام موقع پر ہی دم توڑ گیا۔
ریسکیو ٹیم نے فوری طور پر کارروائی کرتے ہوئے لاش کو لواحقین کے حوالے کیا۔
پولیس نے جائے وقوعہ پر پہنچ کر شواہد اکٹھے کیے ہیں اور فرار ہونے والے ڈرائیور کی تلاش شروع کر دی ہے۔
اس واقعے پر لواحقین اور مقامی شہریوں نے شدید غم و غصے کا اظہار کیا ہے اور انتظامیہ سے مطالبہ کیا ہے کہ ملزم کو جلد از جلد گرفتار کیا جائے اور سڑکوں پر ٹریفک کے حفاظتی اقدامات کو مزید بہتر بنایا جائے تاکہ مستقبل میں ایسے حادثات سے بچا جا سکے۔
