عرب ریاستوں کی غداری کو کبھی فراموش نہیں کریں گے،ایرانی سپہ سالار
![](https://baaghitv.com/wp-content/uploads/2021/05/bakri.jpg)
اسرائیل کے ساتھ تعلقات قائم کرنیوالی عرب ریاستوں کی غداری کو کبھی فراموش نہیں کریں گے،ایرانی سپہ سالار
باغی ٹی وی کی رپورٹ کے مطابق ایرانی مسلح افواج کے سربراہ میجر جنرل محمد باقری نے ایک پیغام میں صہیونی ریاست کے حالیہ جرائم کی مذمت کرتے ہوئے فلسطینی مسئلے کے حل میں ایک طاقتور اسٹرٹیجک اتحاد کے قیام کی ضرورت پر زور دیا اور کہا کہ قابض صہیونی ریاست، مزاحمتی فرنٹ کے غصے کی آگ میں جل جائے گی۔
ایرانی خبر رساں ادارے ارنا کے مطابق میجر جنرل محمد باقری نے فلسطینی سرزمین کے دیگر علاقوں کیخلاف صہیونی ریاست کے حملوں میں نہتے فلسطینی شہریوں کی شہادت کی مذمت کی اور کہا کہ حالیہ دنوں میں ظالم اور بچوں کا قتل کرنے والی ناجائز صہیونی ریاست کے جرائم کے نتیجے میں مظلوم، نہتے اور روزہ دار شہریوں کی شہادت کی وجہ سے پوری دنیا بالخصوص امت مسلمہ کے درمیان غم کی لہر پھیل گئی ہے، ناجائز صہیونی ریاست کے سفاکانہ اقدامات سے فلسطینی قوم کے درمیان اتحاد مزید بڑھ جائے گا اور وہ حتمی فتح کیلئے اپنی مزاحمت پر مزید مطمئن ہوں گے۔
ایرانی سپہ سالارکا مزید کہنا تھا کہ اس وقت مسلم ممالک اور فلسطین کے مظلوم عوام غاصب اور بچوں کی ہلاکت کرنے والی ریاست کیساتھ تعلقات کو معمول پر لانے میں کچھ عرب ریاستوں کے بدنیتی اور غداری کو کبھی فراموش نہیں کریں گے۔ سرزمین فلسطین پر قبضہ اور مظلوم فلسطینیوں کے قتل عام کے 73 سال گزرنے کے بعد القدس کا انتفاضہ پہلے کے مقابلے میں زیادہ جذباتی، پرجوش اور طاقتور ہوتا جارہا ہے۔