اٹک،باغی ٹی وی (ملک امان شجاع سے) اٹک اسلام آباد بلائنڈ کرکٹ ٹیموں کے درمیان منعقد تین میچوں کی سیریز میں اٹک بلائنڈ کرکٹ ٹیم نے دو میچ جیت کر سیریز اپنی طرف کر لی۔
مہمان خصوصی چیف ایگزیکٹو مائی ڈیرہ ساجد خان اور تحصیل سپورٹس آفیسر اٹک میڈیم نور الامین نے اظہار خیال کرتے ہوئے کہا کہ معذور افراد معاشرے کا اہم حصہ ہیں اور ان کی ہمت و حوصلہ کی داد دینی چاہیے۔ انہوں نے مزید کہا کہ نابینا افراد نے بصارت کی کمی کو اپنی ترقی میں رکاوٹ نہیں بنایا اور معاشرے میں فعال کردار ادا کر رہے ہیں۔ "ان کی مثبت سرگرمیاں دیکھ کر خوشی ہوتی ہے۔” انہوں نے کہا۔
اس موقع پر بلائنڈز کرکٹ ٹیم اٹک کے سنیئر کھلاڑی محمد نیاز، محمد سہیل اور دیگر کھلاڑیوں نے کہا کہ اٹک کی بلائنڈ کرکٹ ٹیم نے ملک بھر میں اہم ٹورنامنٹس میں شرکت کی ہے اور متعدد ٹورنامنٹس میں اپنے نام کر کے ضلع کا نام روشن کیا ہے۔ "ہماری ٹیم نے ہمیشہ اپنی صلاحیتوں کا بہترین مظاہرہ کیا ہے اور ہم مستقبل میں بھی اسی جذبے کے ساتھ کھیلیں گے۔” محمد نیاز نے کہا۔
مقررین نے راجہ زاہد حسین سپرنٹنڈنٹ میونسپل کمیٹی اٹک کا بھی شکریہ ادا کیا جن کی سرپرستی اور رہنمائی نابینا افراد کو ہمیشہ دستیاب رہی ہے۔ انہوں نے کہا کہ میونسپل کمیٹی نے ہر موقع پر ان کی حوصلہ افزائی کی اور انہیں ضروری سہولیات فراہم کیں، جس سے ٹیم کی کارکردگی میں بہتری آئی ہے۔
