وفاقی وزیر داخلہ کا عوام دوست منصوبہ تکمیل کے قریب

ننکانہ صاحب: نمائندہ باغی ٹی وی
باغی ٹی وی کی رپورٹ کے مطابق وفاقی وزیر داخلہ بریگیڈئیر(ر) پیر اعجاز احمد شاہ کی خصوصی کاوشوں سے عوام الناس کو سفر کی بہترین سہولت مہیا کرنے کے لیے سڑکوں کی بحالی اور تعمیر و مرمت کو جلد از جلد مکمل کرلیا جائے گا،ترقیاتی کاموں میں استعمال ہونے والے میٹریل کے معیار پر کسی قسم کا بھی سمجھوتہ نہیں کیا جائے گا اگر کسی بھی سکیم میں ناقص میٹریل استعمال ہونے کی نشاندہی ہوگئی تو ٹھیکیدار اور متعلقہ محکمے کے افسران کے خلاف قانون کے مطابق سخت کاروائی عمل میں لائی جائے گی۔ان خیالات کا اظہار ڈپٹی کمشنر ننکانہ صاحب راجہ منصور احمدنے ڈپٹی ڈائریکٹر ڈویلپمنٹ طارق ڈھلوں کے ہمراہ چوکھیانوالہ گاﺅں میں نئی تعمیر ہونے والی سڑک کے جاری کام کا جائزہ لیتے ہوئے کیا ۔ ڈپٹی کمشنر نے کہا کہ علاقائی منصوبے عوام کی خدمت اور ان کی مشکلات دور کرنے کے لیے انتہائی اہم ہیں ان کی بروقت تکمیل مربوط ترقی کی جانب ایک اہم قدم ہے۔ڈپٹی کمشنر نے کہا کہ وہ فیلڈ میں جاری ترقیاتی منصوبوں کو خود بھی چیک کررہے ہیں اور ان منصوبوں کا کوالٹی آڈٹ بھی کروایا جارہا ہے۔انہوں نے افسران کو ہدایت کی کہ وہ تعمیراتی میٹریل کی کوالٹی پر کوئی سمجھوتہ نہ کریں اور منصوبوں کو ان کے سکوپ کے مطابق مکمل کریں۔سردار عثمان بزدار کی حکومت شہری اور دیہی علاقوں میں یکساں طور پر ترقیاتی کام شروع کیے ہوئے ہیں جن کی تکمیل سے علاقائی ترقی و خوشحالی کے ایک نئے سفر کا آغاز ہوگا جس کے لیے ہمیں بھرپور کوشش کرنی جاہیے اس منصوبوں کی تکمیل میں مائل رکاوٹوں کو افسران ذاتی لگن محنت اور دلچسپی سے دورکریں۔