عوام مہنگائی اور بدامنی سے تنگ، موجودہ اسمبلی میں نمائندگی کا فقدان، اسد قیصر

پی ٹی آئی کے رہنما اور سابق سپیکر قومی اسمبلی اسد قیصر نے دعویٰ کیا ہے کہ موجودہ حکومت دسمبر تک قائم نہیں رہے گی اور شہباز شریف کو خود استعفیٰ دے دینا چاہیے۔ انہوں نے لاہور میں حالیہ جلسے کو تاریخی قرار دیتے ہوئے کہا کہ اگر دیگر جماعتیں متحد ہو کر جلسہ کرنا چاہیں تو انہیں ہمارے جلسے کا آدھا بھی دکھانا ہوگا۔اسد قیصر نے مزید کہا کہ عوام مہنگائی اور بدامنی سے تنگ آ چکے ہیں اور موجودہ اسمبلی میں عوام کے نمائندے نہیں ہیں۔ انہوں نے الزام لگایا کہ حکومت اپوزیشن کی مخصوص نشستیں چھیننے کی کوشش کر رہی ہے اور عدلیہ کے احکامات کی خلاف ورزی کر رہی ہے۔
انہوں نے بتایا کہ پی ٹی آئی کی کور کمیٹی کا اجلاس کل منعقد ہوگا جس میں آئندہ کے لائحہ عمل پر بات چیت کی جائے گی۔ اسد قیصر نے حکومت کو تنقید کا نشانہ بناتے ہوئے کہا کہ موجودہ حکومت اخلاقی حدود پار کر چکی ہے اور ملک میں بنیادی حقوق معطل ہیں۔انہوں نے کہا کہ پنجاب حکومت نے جلسے کو روکنے کے لیے غیر قانونی حربے استعمال کیے ہیں اور ان کے پاس حکومت ہٹانے کے علاوہ کوئی آپشن نہیں ہے۔ اسد قیصر نے مزید کہا کہ وہ جلد ہی سڑکوں پر ہوں گے اور ملک کی بہتری کے لیے ہر حد تک جائیں گے۔انہوں نے چیف جسٹس کے فیصلوں پر افسوس کا اظہار کرتے ہوئے کہا کہ انہیں انصاف کے تقاضوں کے مطابق فیصلے کرنے چاہئیں اور اس بات کا ذکر کیا کہ بانی پی ٹی آئی کو انتقام کی بنیاد پر جیل میں رکھا گیا ہے۔ انہوں نے مولانا فضل الرحمان اور دیگر جماعتوں سے بھی اتحاد کی درخواست کی۔