عوام نےعمران خان کو احتساب کا مینڈیٹ دیا آج اس کی فتح کا دن ہے۔ فردوس عاشق

وزیراعظم عمران خان کی مشیر برائے اطلاعات ڈاکٹر فردوس عاشق اعوان نے کہا ہے کہ آج پاکستان تحریک انصاف یوم تشکر منائے گی۔25 جولائی کے انتخابات میں پاکستان کے عوام کی امنگیں اور عمران خان کی 23 سالہ جدوجہد رنگ لائی۔عوام نے عمران خان کو احتساب کا جو مینڈیٹ دیا آج اس کی فتح کا دن ہے۔

باغی ٹی وی کی رپورٹ کے مطابق سماجی رابطے کی ویب سائٹ ٹویٹر پر ٹویٹ کرتے ہوئے فردوس عاشق اعوان نے کہا کہ آج ان عناصر کی شکست کا دن ہے جنہوں نے قوم کے مال میں خیانت کی،عوام کو غریب کرکے اپنے محل تعمیر کئے۔سیاست کو لوٹ مار کے لئے استعمال کرنے والے سیاسی عبرت کا نشان بن رہے ہیں۔قوم ان کی موروثی غلامی مسترد کر چکی ہے۔

فردوس عاشق اعوان نے ایک اور ٹویٹ میں کہا کہ 25 جولائی عوامی شعور کے اظہارکا دن ہے۔اس دن عوام کے کندھے کرپٹ عناصر کی بے ساکھی نہیں بلکہ پاکستان کو بدعنوانی سے پاک کرنے کے مشن کا مضبوط سہارا بنے۔

ٹویٹر پر ایک اور ٹویٹ کرتے ہوئے فردوس عاشق اعوان کا کہنا تھا کہ آج کے دن نسل در نسل اقتدار پر قابض اور سیاسی ایوانوں کو ذریعہ روزگار بنانے والوں کو نظام سے باہر پھینک دیاگیا۔ دو خاندانوں نے باری باری حصول اقتدار کا کھیل رچا کر عوام کا بدترین استحصال کیا۔

واضح رہے کہ اپوزیشن جماعتیں آج 25 جولائی کو گزشتہ برس ہونے الیکشن میں مبینہ دھاندلی کا الزام لگا کر یوم سیاہ منا رہی ہیں. دوسری جانب حکومتی پارٹی تحریک انصاف نے یوم تشکر کا اعلان کر رکھا ہے.