آزاد کشمیر کے تمام اضلاع میں جموں کشمیر جوائنٹ ایکشن کمیٹی کی کال پر شڑ ڈاون اور پہیہ جام ہڑتال جاری ہے۔
آزاد کشمیر کے دارالحکومت مظفرآباد، راولاکوٹ، باغ، پلندری، ڈڈیال، نیلم ویلی سمیت مختلف علاقوں میں احتجاج بھی جاری ہے،نماز جمعہ کے بعد آزاد کشمیر بھر میں عوام کی بڑی تعداد سڑکوں پر نکل آئی،لائن آف کنٹرول تتہ پانی میں عوام کی ایک بڑی تعداد حکومت کے خلاف احتجاج کر رہی ہے،ضلع حویلی فارورڈ کہوٹہ میں بھی مکمل شٹر ڈاؤن اور پہیہ جام ہڑتال جاری ہے،مظفر آباد میں لاری اڈہ ویران ہے، ٹرانسپورٹر نے گاڑیاں کھڑی کر دی ہیں، دکانیں بند ہیں، مسافروں کو شدید مشکلات کا سامنا کرنا پڑ رہا ہے
مظفرآباد میں حالات کشیدگی کی طرف جا رہے ہیں پولیس نے عوام پر لاٹھی چارج کیا ہے، سماں بانڈی اور ٹانگہ اسٹینڈ میں عوام پر پولیس نے لاٹھی چارج کیا ہے اور آنسو گیس کی شیلنگ کی ہے،پولیس حکام کا کہنا ہے کہ راستہ بند نہیں ہے، جو بھی پتھراؤ کرے گا اس کو ہم گرفتار کر لیں گے
مظفرآباد کے کمشنر مسعود الرحمان نے میڈیا سے گفتگو کرتے ہوئے مظاہرین سے اپیل کی ہے کہ وہ پرامن طریقے سے اپنا احتجاج ریکارڈ کرائیں، ریاست میں دفعہ 144 نافذ ہے، اس لیے کسی کواجتماع کی اجازت نہیں ہے،کمشنر مظفرآباد نے وزیراعظم آزاد کشمیر چوہدری انورالحق کا پیغام جموں وکشمیر جوائنٹ عوامی ایکشن کمیٹی تک پہنچا دیا جس میں کہا گیا کہ پرامن رہیں، شٹر اور پہیہ جام کے بعد بھی حکومت مذاکرات کے لیے تیار ہے، مظفرآباد ہم سب کا شہر ہے اسے زلزلےکے بعد تنکا تنکا جمع کرکے بنایا،مذاکراتی کمیٹی پہلے سے بنی ہے ایکشن کمیٹی والے ہمارے بھائی ہیں، آج ایجی ٹیشن کا ماحول نہ بنایا جائے، جلسہ وجلوس پر پابندی ہے۔
ایس ایس پی ٹورسٹ پولیس ریاض حیدر بُخاری کی جانب سے جاری بیان میں کہا گیا کہ کشمیر میں 10,11 مئی 2024 کو ہڑتال کا اعلان ہوا ہے،حالات نارمل ہونے تک ٹورسٹ پولیس سیاحوں کی رہنمائی کے لیے جملہ سیاحتی مقامات پر موجود نہ ہو گی،سیاحوں سے گذارش ہے کہ ان ایّام میں سفر سے اجتناب کیا جائے
گزشتہ ایک برس سے بجلی کے بھاری بلز اور مہنگائی کے خلاف عوامی احتجاج کی قیادت کرنے والی جوائنٹ عوامی ایکشن کمیٹی نے کل رات شٹر ڈاؤن اور پہیہ جام ہڑتال کا اعلان کیا تھا۔ بجلی کے بھاری بِلز اور مہنگائی کے خلاف احتجاجی مظاہروں کا سلسلہ جاری ہے، کل ضلع میرپور کے شہر ڈوڈیال میں شہریوں نے بجلی بلوں بارے احتجاج کیا تھا اس میں بے شمار املاک کو نظر آتش کیا گیا تھا،
