اعظم سواتی کو سکھر سے اسلام آباد منتقل کر دیا گیا

اسلام آباد: پولیس نے پی ٹی آئی رہنما اعظم سواتی کو سکھر سے اسلام آباد پہنچادیا۔

باغی ٹی وی : سندھ ہائیکورٹ میں سینیٹر اعظم سواتی کے خلاف مقدمات سے متعلق کیس کی سماعت ہوئی،آئی جی سندھ پولیس نےسندھ ہائیکورٹ سے ایک مرتبہ پھر معذرت کرلی کہا کہ گزشتہ سماعت پر جو ہوا اس پر معذرت چاہتا ہوں-

پراسیکیوٹر جنرل سندھ نے سندھ ہائیکورٹ کو بتایا کہ اعظم سواتی کے خلاف صوبے میں درج 34 مقدمات سی کلاس کردیے گئے ہیں اور ان کی کسٹڈی اسلام آباد کو دے دی گئی ہے۔

پراسیکیوٹر جنرل نے بتایا کہ اعظم سواتی کے خلاف مقدمات سی کلاس کردئیے گئے ہیں،اعظم سواتی کے خلاف تمام درخواستیں اب غیر موثر ہوچکی ہیں –

جسٹس کے کے آغا نے کہا کہ سندھ حکومت اور آئی جی سندھ نے معاملے کو حل کیا ان کو کریڈٹ جاتا ہے ،اعظم سواتی کے خلاف سندھ میں کوئی اور مقدمہ نہیں ہونا چاہیے ،اعظم سواتی کے خلاف سندھ میں جومقدمات درج تھے ان میں ایک ہی الزام ہے-

پراسیکیوٹر جنرل نے کہا کہ معاملات کو قانون کے مطابق دیکھا جائے گا –

سندھ ہائیکورٹ نے کہا کہ پراسیکیوٹر جنرل اور آئی جی نے ان ایف آئی آرز کا جائزہ لیا ،تین دن میں متعلقہ عدالتوں میں سی کلاس کی رپورٹ جمع کرادی جائے –

سندھ ہائیکورٹ نے اعظم سواتی کے بیٹے عثمان سواتی کی درخواست نمٹادی-

دوسری جانب ذرائع کے مطابق مقدمات ختم ہونے کے بعد پولیس نے پی ٹی آئی رہنما کو اب سکھر سے اسلام آباد پہنچا دیا ہے۔

اعظم سواتی کو سکھرسے خصوصی طیارے کے ذریعے اسلام آباد لایا گیا جہاں اسلام آباد پولیس کے ایس پی رخسار مہدی اعظم سواتی کو اپنے ساتھ لے گئے۔