سعد فاروق
اڈیالہ جیل حکام نے بانی پی ٹی آئی کو فراہم کی جانے والی خصوصی جیل سہولیات پر اعتراض اٹھاتے ہوئے اسپیشل جج سنٹرل اسلام آباد کی عدالت میں غیر معمولی رپورٹ جمع کرائی ہے۔
باغی ٹی وی کے مطابق رپورٹ میں عدالت سے استدعا کی گئی ہے کہ عمران خان کو بیرون ملک موجود بچوں سے رابطے اور ذاتی معالج سے طبی معائنے کی اجازت سے متعلق فیصلوں پر نظرثانی کی جائے۔رپورٹ کے مطابق، جیل قوانین میں کسی قیدی کو بیرون ملک کال کی اجازت یا ذاتی معالج سے باقاعدہ چیک اپ کی سہولت فراہم کرنے کا کوئی ذکر موجود نہیں۔ جیل سپرنٹنڈنٹ نے عدالت سے 10 جنوری اور 3 فروری کے عدالتی احکامات پر نظرثانی کی اپیل کرتے ہوئے کہا ہے کہ ان سہولیات کو جاری رکھنا دیگر قیدیوں کے لیے عدم مساوات اور آئینی خلاف ورزی کے مترادف ہو گا۔
جیل حکام نے انکشاف کیا کہ عمران خان کو ایسی سہولیات حاصل ہیں جو بقیہ قیدیوں کو دستیاب نہیں۔ اس غیر مساوی سلوک کے باعث دیگر قیدیوں نے بھی ایسی سہولیات کا مطالبہ شروع کر دیا ہے۔ رپورٹ میں کہا گیا ہے کہ عدالت کا فیصلہ مستقبل میں جیل قوانین کی خلاف ورزی اور عدالتی نظام کو دباؤ میں لانے کے لیے بطور مثال استعمال ہو سکتا ہے۔
آرٹیکل 25 کا حوالہ
رپورٹ میں آئینِ پاکستان کے آرٹیکل 25 کا حوالہ دیتے ہوئے کہا گیا ہے کہ تمام شہری قانون کے سامنے برابر ہیں، اور رنگ، نسل یا عقیدے کی بنیاد پر کسی کے ساتھ امتیاز نہیں برتا جا سکتا۔ جیل حکام نے مؤقف اختیار کیا کہ صرف ایک قیدی کو بیرون ملک کال کی اجازت دینا نہ صرف دیگر قیدیوں کے بنیادی حقوق کی خلاف ورزی ہو گا بلکہ آئندہ کے لیے ایک خطرناک نظیر بھی قائم کرے گا۔
غیر ملکی قیدیوں کی مثال
رپورٹ میں بتایا گیا کہ اڈیالہ جیل میں اس وقت 93 غیر ملکی قیدی موجود ہیں، جو اپنے اہل خانہ سے بیرون ملک رابطے کے خواہشمند ہیں۔ تاہم کسی کو یہ سہولت فراہم نہیں کی گئی۔ ایسے میں صرف ایک قیدی کو اس سہولت تک رسائی دینا امتیازی سلوک کے زمرے میں آتا ہے۔
جیل رولز 1978 کا حوالہ
رپورٹ میں واضح کیا گیا کہ مذکورہ سہولیات جیل رولز 1978 میں شامل نہیں ہیں، اور ان کے نفاذ سے نہ صرف قانونی پیچیدگیاں پیدا ہوں گی بلکہ جیل انتظامیہ پر غیر مجاز مطالبات کا دباؤ بھی بڑھ سکتا ہے۔
آپریشن بنیان مرصوص،تباہ شدہ بھارتی طیاروں کی تعداد سات ہو گئی
عمران خان کے پولی گرافک اور فوٹو گرامیٹک ٹیسٹ کی اجازت
بھارتی ایس-400 سسٹم تباہ ،پاکستان کے عالمی برادری کو شواہد بھی پیش
اسلام آباد یونائیٹڈ میں رسی وین ڈر ڈوسن اور ایلکس ہیلز کی واپسی
پاک بھارت کشیدگی،برطانوی وزیر خارجہ کا16 مئی کو پاکستان پہنچنے کا امکان
