کراچی:وزیراعلیٰ سندھ سید مراد علی شاہ نے دعویٰ کیا ہے کہ سندھ حکومت نے تعلیم کے بلند معیار کے لئے ہمیشہ اپنی توجہ مرکوز رکھی ہے۔
باغی ٹی وی کی رپورٹ کے مطابق مراد علی شاہ نے عالمی یوم خواندگی پر پیغام دیتے ہوئے کہا کہ دنیا میں وہ ہی قومیں ترقی کرتی ہیں جن کا تعلیمی نظام مضبوط ہوتا ہے۔ہ سندھ حکومت نے تعلیم کے بلند معیار کیلئے ہمیشہ خاص توجہ مرکوز کی ہے، سکول سے باہر بچوں کو سکول لانے کے لئے بہترین انتظامات کئے ہیں۔وزیراعلیٰ سندھ نے یہ بھی کہا کہ مائیکرو سکول کے قیام سے 3 لاکھ سے زائد بچوں کو تعلیمی اداروں کا حصہ بنائیں گے۔ جدید دور کے تقاضوں کو مد نظر رکھ کر تعلیمی نظام میں جدت لا رہے ہیں، ایک لاکھ ڈیجیٹل سکول آئندہ 2 سال میں قائم کرنے کے عزم کو پورا کریں گے۔
واضح رہے سندھ میں 41 لاکھ بچے سکولوں سے باہر ہیں، سندھ حکومت ان بچوں کی تعلیمی ضروریات کو بہتر طریقے سے پورا کرنے کے لیے غیر رسمی تعلیم کی اتھارٹی بنائے گی۔ وزیر اعلیٰ سندھ سید مراد علی شاہ کی تمام پرائمری سکولوں کو بتدریج پوسٹ پرائمری سکولوں میں اپ گریڈ کرنے کی پالیسی پر عمل درآمد کرنے کی ہدایت کر دی ۔
Leave a reply
