بہاولپور (نامہ نگار حبیب خان) پاکستان کے 78ویں یومِ آزادی کی مناسبت سے ڈرنگ اسٹیڈیم بہاولپور میں پنجاب اور بہاولپور ڈویژن ٹائیکوانڈو ایسوسی ایشن کے زیرِ اہتمام ٹائیکوانڈو چیمپئن شپ کا انعقاد کیا گیا۔
اس ٹورنامنٹ میں ڈویژن بھر کی 20 ٹیموں نے شرکت کی اور کھلاڑیوں نے اپنی مہارت کا شاندار مظاہرہ کیا۔ چیمپئن شپ کا مقصد نوجوانوں میں کھیلوں کی حوصلہ افزائی کرنا اور ٹائیکوانڈو جیسے مارشل آرٹس کو فروغ دینا تھا۔
مقابلوں کے دوران کھلاڑیوں نے بھرپور تکنیک اور مہارت کے ساتھ ایک دوسرے کو شکست دینے کی کوشش کی۔ شریک کھلاڑیوں نے کہا کہ ایسے ایونٹس کا تسلسل جاری رہنا چاہیے تاکہ نوجوان کھلاڑیوں کو بین الاقوامی پلیٹ فارمز پر اپنی صلاحیتیں دکھانے کا موقع مل سکے۔
