نئی دہلی (باغی ٹی وی)پاکستان نے رواں سال بیساکھی میلے میں شرکت کے لیے بھارت سے تعلق رکھنے والے 6500 سے زائد سکھ یاتریوں کو ویزے جاری کر دیے ہیں۔
پاکستان ہائی کمیشن کے مطابق، یہ یاتری 10 اپریل سے 19 اپریل 2025 تک پاکستان میں منعقد ہونے والی سالانہ مذہبی تقریبات میں شرکت کریں گے۔ اس دوران یاتری گوردوارہ پنجہ صاحب، گوردوارہ ننکانہ صاحب اور دیگر مقدس مقامات کی زیارت کریں گے۔
اس موقع پر پاکستان ہائی کمیشن کے ناظم الامور سعد احمد وڑائچ نے کہا کہ حکومت پاکستان کی جانب سے اتنی بڑی تعداد میں ویزوں کا اجرا مذہبی ہم آہنگی کو فروغ دینے کی پالیسی کا واضح ثبوت ہے۔ انہوں نے مزید کہا کہ پاکستان اپنے مقدس اور مذہبی مقامات کے دوروں میں سہولت فراہم کرنے کا سلسلہ جاری رکھے گا۔
