سعد فاروق
محکمہ موسمیات نے خبردار کیا ہے کہ ملک کے شمالی علاقوں میں 3 سے 5 جون کے دوران گرج چمک کے ساتھ بارشیں متوقع ہیں، جبکہ میدانی علاقے عیدالاضحیٰ کے دوران شدید گرمی اور خشک موسم کی لپیٹ میں رہیں گے۔
ادارے کے مطابق، نم آلود ہوائیں شمال مشرقی علاقوں میں داخل ہو رہی ہیں اور مغربی سسٹم 3 جون سے شمالی علاقوں پر اثرانداز ہوگا جو 5 جون تک جاری رہے گا۔بارش کی زد میں آنے والے اضلاع میں چترال، دیر، سوات، کوہستان، شانگلہ، بونیر، مانسہرہ، ایبٹ آباد، ہری پور، کرک، بنوں، لکی مروت اور کوہاٹ شامل ہیں۔
مزید برآں، کشمیر، گلگت بلتستان، اسلام آباد، راولپنڈی، مری، گلیات، اٹک، چکوال، جہلم اور گجرات میں بھی بارش کی توقع ظاہر کی گئی ہے۔پی ڈی ایم اے پنجاب نے 2 سے 5 جون کے دوران شدید آندھی، تیز ہواؤں اور بارشوں کے خدشے پر وارننگ جاری کر دی ہے۔ حالیہ موسم کی شدت کے باعث صوبے کے مختلف اضلاع میں 12 افراد زندگی کی بازی ہار چکے ہیں۔
سیالکوٹ، ناروال، لاہور، شیخوپورہ، فیصل آباد، جھنگ، ٹوبہ ٹیک سنگھ، گوجرانوالہ اور حافظ آباد میں ہلکی سے درمیانے درجے کی بارش کا امکان ہے، جبکہ جنوبی پنجاب میں آندھی اور گرد آلود ہوائیں چلنے کی پیشگوئی ہے۔نیشنل ایمرجنسی آپریشن سینٹر (این ڈی ایم اے) نے 2 سے 7 جون کے دوران ممکنہ شدید موسمی حالات کے لیے ملک گیر الرٹ جاری کیا ہے۔
پنجاب، سندھ اور بلوچستان کے اکثر علاقوں میں موسم خشک اور شدید گرم رہے گا۔ تاہم پوٹھوہار، شمال مشرقی پنجاب، خیبرپختونخوا، گلگت بلتستان اور آزاد کشمیر میں وقفے وقفے سے بارش اور آندھی کا امکان ہے۔خیبرپختونخوا کے شمالی اضلاع جیسے چترال، دیر، سوات، کوہستان، شانگلہ، مالاکنڈ، ایبٹ آباد اور کرم میں 2 سے 6 جون تک گرج چمک کے ساتھ بارش متوقع ہے، جبکہ دیگر اضلاع میں موسم خشک اور گرم رہے گا۔
سندھ کے کراچی، حیدرآباد، سکھر، لاڑکانہ اور میرپورخاص سمیت بیشتر علاقوں میں بھی موسم خشک اور درجہ حرارت بلند رہنے کا امکان ہے۔بلوچستان کے شہروں کوئٹہ، تربت، گوادر، خضدار اور ژوب میں بھی شدید گرمی کی پیشگوئی کی گئی ہے اور بارش کا کوئی امکان نہیں ہے۔
شہریوں کو مشورہ دیا گیا ہے کہ وہ ممکنہ موسمی شدت کے دوران احتیاطی تدابیر اختیار کریں اور غیر ضروری سفر سے پرہیز کریں۔
جنرل اوپندر دیویدی کا مذہبی آشرم کا دورہ ،بھارتی فوج کی سیکولر روایت پر سوالیہ نشان
پنجاب بلدیاتی انتخابات ، قانون سازی نہ ہوئی تو خود فیصلہ کریں گے،الیکشن کمیشن
پاکستان نے بھارت کے 4 رافیل طیارے گرائے وزیراعظم کا بڑا انکشاف
بھارت نے سندھو پر حملہ کیا، کشمیر کا مسئلہ حل ہونے تک امن ممکن نہیں،بلاول بھٹو
