کراچی: سندھ ہائی کورٹ نے سانحۂ بلدیہ فیکٹری کے مفرور ملزم حماد صدیقی کی گرفتاری کے لیے انٹرپول سے رجوع کرنے کا حکم دے دیا ہے۔ یہ حکم قتل کیس میں نامزد دبئی فرار ملزمان کی پاکستان حوالگی کے کیس کی سماعت کے دوران دیا گیا۔
سماعت کے دوران محکمۂ داخلہ اور خارجہ نے اپنی رپورٹ سندھ ہائی کورٹ میں جمع کروا دی، جس میں بتایا گیا کہ انٹرپول کو ملزمان کی گرفتاری کے لیے درخواست ارسال کر دی گئی ہے۔عدالت نے مفرور ملزم خرم نثار سے متعلق محکمۂ داخلہ کے فوکل پرسن کو بھی طلب کیا ہے تاکہ اس کیس کی مزید تفصیلات اور پیشرفت پر غور کیا جا سکے۔عدالت نے اس درخواست پر سماعت 22 اپریل تک ملتوی کر دی۔ اس وقت تک ملزمان کی گرفتاری کے لیے مزید اقدامات کیے جائیں گے۔مقدمے میں ملزمان تقی حیدر، حماد صدیقی اور خرم نثار مفرور ہیں۔ ڈپٹی اٹارنی جنرل نے بتایا کہ تقی حیدر سے متعلق کاغذات متحدہ عرب امارات کو بھیج دیے گئے ہیں تاکہ اس کی گرفتاری کی کارروائی کی جا سکے۔
یاد رہے کہ ماہم امجد نے اپنے والد کے مبینہ قاتل تقی حیدر کی پاکستان منتقلی کے لیے درخواست دائر کی تھی تاکہ انصاف حاصل کیا جا سکے۔
