بلوچستان: انتخابی مہم کے دوران حملوں کی وجہ سے بلوچستان میں ڈبل سواری پر پابندی

بلوچستان : انتخابی مہمات کے دوران ایک ہی دن بلوچستان کے مختلف واقعات میں کم سے کم سات افراد زخمی ہوئے جبکہ دو بموں کو ناکارہ بنایا گیا۔ پولیس کے مطابق کوئٹہ میں تین دنوں میں چھ بم دھماکوں کے بعد موٹرسائیکل کی ڈبل سواری پر پابندی عائد کردی گئی۔ مختلف واقعات جن میں قلات کے علاقے مغلزئی میں پاکستان پیپلز پارٹی کے ضلعی الیکشن آفس اور خاران میں مسلم لیگ ن کے امیدوار کے گھر پر دستی بم حملے ہو گئے۔قلات کے علاقے مغلزئی میں ہونے والے دستی بم حملے میں پاکستان پیپلز پارٹی کے تین کارکن زخمی ہو گئے، زخمی ہونے والے کارکنوں میں نصیب اللہ، ظہور احمد اور محمد رمضان شامل ہیں۔پولیس کے مطابق زخمی کارکنوں کو قریبی ڈسٹرکٹ ہیڈکوارٹرز ہسپتال منتقل کر دیا گیا، نامعلوم افراد پیپلز پارٹی کے ضلعی الیکشن آفس پر ہینڈ گرنیڈ پھینک کر فرار ہوئے۔دوسری جانب خاران میں مسلم لیگ ن کے امیدوار شعیب نوشیروانی کے گھر پر دستی بم حملہ ہوا۔پولیس کے مطابق بم گھر کے صحن میں گر کر زور دار دھماکے سے پھٹ گیا، دھاکے سے گھر کے شیشے ٹوٹ گئے تاہم کوئی جانی نقصان نہیں ہوا۔ اسی طرح محکمہ داخلہ بلوچستان ذرائع کے مطابق پابندی پانچ فروری تک برقرار رہے گی تاہم خواتین، بچے اور بزرگ شہری اس پابندی سے مستثنٰی ہوں گے۔کوئٹہ کے علاقے مشرقی بائی پاس پر شیر جان اسٹاپ کے قریب صبح اور شام کو دو دھماکے ہوئے جس میں آزاد انتخابی امیدوار کے دفتر پر دستی بم حملے میں چار افراد زخمی ہوئے۔ڈیرہ بگٹی کے علاقے پٹ فیڈر میں بارودی سرنگ کے دھماکے میں متعدد مال مویشی ہلاک ہوئے۔پنجگور تربت خاران نوشکی میں اہم سیاسی شخصیات و انتخابی امیدواروں کے گھروں، انتخابی مہم اور دفاتر پر دستی بموں سے حملے کئے گئے۔مند میں آزاد امیدوار فدا حکیم کے قافلے پر فائرنگ کی گئی جس کے باعث قافلے میں شامل تین گاڑیوں کو نقصان پہنچا تاہم کوئی جانی نقصان نہیں ہوا۔نوشکی میں پولیس تھانے پر دستی بم حملہ کیا گیا۔ جیونی میں سرکاری اسکول پر دستی بم حملے میں چھت کو نقصان پہنچا۔
چیئرمین پیپلزپارٹی بلاول بھٹو زرداری نے قلات میں پیپلزپارٹی کے انتخابی دفتر پر بم حملے کی مذمت کی، انہوں نے کہا کہ بھٹو شہید کے جیالے اور محترمہ بینظیر بھٹو شہید کے بہادر بھائی بم حملوں سےنہیں ڈرتے۔بلاول بھٹو زرداری نے بم حملے میں زخمی کارکنوں کی جلد صحت یابی کیلئے دعا کی اور کہا کہ بلوچستان کی ترقی اور عوام سیاسی، سماجی اور معاشی انصاف کیلئے جدوجہد جاری رکھیں گے، پیپلز پارٹی کے انتخابی دفتر پر بم حملے میں ملوث مجرموں کو گرفتار کیا جائے۔