اوچ شریف / ڈیرہ غازی خان (باغی ٹی وی،نامہ نگار+سٹی رپورٹر)جنوبی پنجاب کے دو بڑے اضلاع بہاولپور اور ڈیرہ غازی خان میں شہریوں کی قیمتی جانوں کے تحفظ کے لیے ضابطہ فوجداری کی دفعہ 144 کے تحت نہروں، آبی گزرگاہوں اور دریاؤں میں نہانے، تیرنے، کشتی رانی، کھیل کود اور غیر ضروری اجتماعات پر مکمل پابندی عائد کر دی گئی ہے۔
ڈپٹی کمشنر بہاولپور ڈاکٹر فرحان فاروق نے ضلع بھر میں نہروں اور پانی کے دیگر ذخائر میں نہانے پر 30 روزہ پابندی عائد کرنے کا اعلان کیا ہے، جبکہ ڈپٹی کمشنر ڈیرہ غازی خان محمد عثمان خالد نے 27 جولائی تک دفعہ 144 کے نفاذ کا حکم جاری کرتے ہوئے دریائے سندھ اور تمام بڑی نہروں کے کنارے سرگرمیوں پر مکمل روک لگا دی ہے۔
دونوں اضلاع میں جاری اعلامیوں کے مطابق یہ فیصلے بڑھتے ہوئے ڈوبنے کے واقعات، انسانی جانوں کے ضیاع اور موسم برسات کے خطرات کے پیش نظر کیے گئے ہیں۔ انتظامیہ نے والدین سے خصوصی اپیل کی ہے کہ وہ اپنے بچوں کو نہروں اور دریا کے قریب جانے سے روکیں اور قانون کی پابندی کرتے ہوئے اپنی اور دوسروں کی حفاظت یقینی بنائیں۔
دونوں ڈپٹی کمشنرز نے واضح کیا ہے کہ دفعہ 144 کی خلاف ورزی پر سخت قانونی کارروائی کی جائے گی اور کوئی نرمی نہیں برتی جائے گی۔ یہ پابندیاں فوری طور پر نافذ العمل ہیں اور ان کا مقصد صرف ایک ہے: انسانی جانوں کو بچانا اور ممکنہ سانحات کا راستہ روکنا۔
انتظامیہ کا یہ فیصلہ عوامی تحفظ کے لیے ایک بروقت اور سنجیدہ اقدام قرار دیا جا رہا ہے۔
