بارش ہمارے کنٹرول میں نہیں ہے، ہم نے پوری جان لڑائی،محمد رضوان

برسبین: پاکستان کرکٹ ٹیم کے کپتان محمد رضوان کا آسٹریلیا کے خلاف پہلے ٹی ٹوئنٹی میں شکست کے بعد کہنا ہے کہ بولرز نے پوری جان لڑا ئی ہے، ہماری ٹیم میں کمزوریاں ہیں، جب جیتتے بھی ہیں تب بھی اپنی غلطیوں کو دیکھتے ہیں۔

باغی ٹی وی : میچ کے بعد قومی ٹیم کے کپتا ن محمد رضوان نے پریس کانفرنس کرتے ہوئے کہا کہ پورا میچ بڑا تیز تھا،میکسویل نے بڑی اچھی بیٹنگ کی، مجھے اپنے بولرزپر پورا اعتماد ہے، اس طرح کے میچ کسی چیز کی پیش گوئی نہیں کر سکتے ٹاس جیت کر بولنگ کا فیصلہ اس لیے کیا کہ آسٹریلیا کو کم سے کم رنز تک محدود کرنے کی کوشش کریں۔

قومی ٹیم کے کپتان کاکہنا تھا کہ بولرز نے پوری جان لڑا ئی ہے، ہماری ٹیم میں کمزوریاں ہیں، جب جیتتے بھی ہیں تب بھی اپنی غلطیوں کو دیکھتے ہیں،بولرز نے ہمیشہ پرفارم کیا اور ساتھ میں بیٹرز نے بھی پرفارم کیا، بارش ہمارے کنٹرول میں نہیں ہے، ہم نے پوری جان لڑائی، میکسویل کی گیم ہی ایسی ہے چاہے ون ڈے ہو یا ٹی ٹوئنٹی میچ ،اس کی بیٹنگ نے میچ میں فرق ڈالا ،ابھی ہم اچھے کھلاڑی تلاش کر رہے ہیں اور بہترین پلیئنگ الیون تشکیل دینے کی کوشش کر رہے ہیں۔

دوسری جانب پاکستان سے پہلے ٹی ٹوئنٹی میچ میں جیت کے بعد آسٹریلوی کپتان جوش انگلس نے کہا ہے کہ ٹیم نے شاندار فتح حاصل کر کے مداحوں کے دل جیت لیے انہوں نے کھلاڑیوں کی کارکردگی کی تعریف کی اور کہا، "بہت ہی اچھی فتح رہی لڑکوں نے خود کو بہترین طریقے سے ثابت کیا۔ ون ڈے سیریز کے بعد جیت حاصل کرنا بہت خوشی کی بات ہے۔

آسٹریلوی کپتان نے خاص طور پر بولرز کی تعریف کرتے ہوئے کہا، "بولرز نے شروع میں ہی وکٹیں حاصل کر کے بہترین کام کیا اور جو بھی حکمت عملی اپنائی، اسے کامیابی سے انجام دیا، یہ فتح کھلاڑیوں کی لگن اور محنت کا نتیجہ تھی اور اس جیت نے ٹیم کے حوصلے کو مزید بلند کر دیا ہے۔

واضح رہے کہ پاکستان اور آسٹریلیا کے درمیان 3 ٹی ٹوئنٹی میچز کی سیریز کا پہلا میچ آج برسبین میں کھیلا گیا ۔ بارش سے متاثرہ میچ میں آسٹریلیا نے پاکستان کو 29 رنز سے شکست دی، بارش کے باعث دونوں ٹیموں کے درمیان فی اننگز 7 اوورزکا کھیل ہوا، پاکستان نے ٹاس جیت کر بولنگ کا فیصلہ کیا تھا۔

آسٹریلیا کی جانب سے گلین میکسویل 19 گیندوں پر 43 رنز کی شاندار اننگز کھیل کے آؤٹ ہوئے تھے، ان کی اننگز میں 5 چوکے اور 3 چھکے شامل تھے آسٹریلیا کی جانب سے دیئے گئے 94 رنز کے ہدف کے تعاقب میں پاکستانی ٹیم مقررہ 7 اوورز میں 9 وکٹوں کے نقصان پر 64 رنز ہی بنا سکی۔