لاہور(باغی ٹی وی )سیاسی معاملات پر بات سیاستدانوں سے کریں، بیرسٹر گوہر کی ملاقات کا احوال
تفصیلات کے مطابق سیکیورٹی ذرائع کا کہنا ہے کہ بیرسٹر گوہر اور علی امین گنڈاپور کی ملاقات کے دوران سیکیورٹی اور انسداد دہشت گردی کے معاملات پر تفصیل سے بات چیت ہوئی۔ ملاقات کا مقصد خیبر پختونخوا میں سیکیورٹی کے انتظامات اور دہشت گردی کے خلاف اقدامات پر تبادلہ خیال تھا، تاہم ملاقات کے دوران سیاسی معاملات پر گفتگو کرنے کی کوشش کی گئی جس پر جواباً کہا گیا کہ سیاسی امور پر بات چیت سیاستدانوں کے ساتھ کی جائے۔
ذرائع کے مطابق، بیرسٹر گوہر نے ملاقات کے دوران آرمی چیف سے سیاسی معاملات پر بات کرنے کی کوشش کی، جس پر انہیں یہ جواب دیا گیا کہ فوجی قیادت کا دائرہ سیکیورٹی اور انسداد دہشت گردی کے معاملات تک محدود ہے، اور سیاسی معاملات پر گفتگو سیاستدانوں سے کی جائے۔ اس کے بعد بیرسٹر گوہر اور علی امین گنڈاپور کے درمیان بات چیت کو صرف سیکیورٹی مسائل تک محدود رکھا گیا۔
یاد رہے کہ بیرسٹر گوہر اور علی امین گنڈاپور نے آرمی چیف سے ملاقات کی تھی، جس میں انہوں نے سیاسی امور کو زیر بحث لانے کی کوشش کی تھی، تاہم اس درخواست کو مسترد کرتے ہوئے کہا گیا کہ آرمی کی ترجیح سیکیورٹی معاملات ہیں، نہ کہ سیاسی گفتگو۔
ملاقات کے بعد کچھ ذرائع نے اس بات چیت کو سیاق و سباق سے ہٹ کر پیش کرنے کی کوشش کی، اور اسے سیاسی رنگ دینے کی کوشش کی۔ سیکورٹی ذرائع کی جانب سے اس بات پر بھی افسوس کا اظہار کیا گیا کہ سیکیورٹی کے اہم معاملات پر ہونے والی بات چیت کو غیر ضروری طور پر سیاست کا رنگ دیا گیا، جو کہ غیر مناسب ہے۔
اس ملاقات کا مقصد صرف خیبر پختونخوا میں سیکیورٹی کی صورت حال کو بہتر بنانا تھا، اور یہی بات چیت کے اصل مواد کا حصہ تھی۔
