پنجاب کے صوبائی دارالحکومت لاہو رمیں دو افسوسناک واقعات پیش آئے ہیں، چچا نے بھتیجی اور بھائی نے بہن کو گولیاں مار کر قتل کر دیا
لاہور کے علاقے چوہنگ میں ایک افسوسناک واقعہ پیش آیا جہاں چچا نے اپنی 17 سالہ بھتیجی کو فائرنگ کر کے قتل کر دیا۔ پولیس ذرائع کے مطابق گھریلو جھگڑے کے باعث چوہنگ کے علاقے میں چچا نے اپنی بھتیجی سماہا پر گولیاں چلا دیں جس سے وہ موقع پر جاں بحق ہو گئی۔ واردات کے بعد ملزم فرار ہونے میں کامیاب ہو گیا۔پولیس اور فارنزک ٹیمیں جائے وقوعہ پر پہنچیں اور لاش کو پوسٹ مارٹم کے لیے منتقل کر دیا گیا۔ پولیس حکام کے مطابق ملزم کی گرفتاری کے لیے چھاپے مارے جا رہے ہیں اور جلد ہی ملزم کو قانون کے کٹہرے میں لایا جائے گا۔
دوسری جانب لاہور کے علاقے ہجویری اسکیم میں بھائی نے فائرنگ کر کے اپنی 23 سالہ بہن کو قتل کر دیا۔ پولیس کے مطابق یہ واقعہ ہربنس پورہ کے علاقے میں پیش آیا، جہاں ملزم نے اپنی بہن لائبہ فاطمہ کو گولی مار دی۔ فائرنگ کے بعد ملزم فرار ہو گیا۔ابتدائی اطلاعات کے مطابق مقتولہ لائبہ فاطمہ طلاق یافتہ تھی۔ پولیس نے جائے وقوعہ پر پہنچ کر شواہد اکٹھے کیے اور تفتیش کا آغاز کر دیا ہے۔
