امریکا سے جرمنی جانے والی پرواز میں ایک بھارتی شہری نے دوران پرواز دو کم عمر لڑکوں کو کانٹے سے زخمی کر دیا۔
امریکی میڈیا کے مطابق بھارتی شہری نے عملے کے ایک رکن کو اور ایک خاتون مسافر کو تھپڑ مارنے کی بھی کوشش کی جس کے بعد طیارے کو ہنگامی طور پر بوسٹن میں اتارنا پڑا،امریکی وفاقی تحقیقاتی ادارے ایف بی آئی کے مطابق واقعہ ہفتے کے روز شکاگو سے روانہ ہونے والی پرواز میں پیش آیا۔،پرواز میں کھانا دیے جانے کے بعدایک 17 سالہ لڑکا سو رہا تھا کہ اچانک اس کی آنکھ کھلی اور اس نے دیکھا کہ ملزم پرنیت کمار اس کے اوپر جھکا ہوا ہے، اس دوران ملزم نے لڑکےکے بائیں کندھے پر دھات کے کانٹے سے وار کیا،اس کے بعد ملزم نے ساتھ والی سیٹ پر موجود ایک دوسرے 17 سالہ لڑکے کے سر کے پچھلے حصے پر کانٹے سے وار کیا جس سے اس کے سر پر کٹ لگ گیا،عملے نے ملزم کو قابو کرنے کی کوشش کی تو اس نے اپنی انگلیوں سے بندوق کا اشارہ بنا کر منہ میں رکھنے کی اداکاری کی جیسے خود کو گولی مار رہا ہو، اسی دوران اس نے اپنے بائیں جانب بیٹھی ایک خاتون مسافر کو تھپڑ مارا اور ایک فلائٹ اٹینڈنٹ پر حملہ کرنے کی کوشش کی۔
امریکی پراسیکیوٹر کے دفتر کے مطابق 28 سالہ بھارتی شہری پر خطرناک ہتھیار سے جسمانی نقصان پہنچانے کے ارادے سے حملہ کرنے کا الزام عائد کیا گیا ہے،الزام ثابت ہونے پر ملزم کو 10 سال قید اور 2 لاکھ 50 ہزار ڈالر تک جرمانے کی سزا ہو سکتی ہے۔
