مدھیہ پردیش کے شہر اندور میں ایک بھکاری کو بھیک دینے کا معاملہ پولیس اسٹیشن تک پہنچ گیا ہے، جس کے نتیجے میں پولیس نے ایک نامعلوم شخص کے خلاف ایف آئی آر درج کر لی ہے۔
یہ واقعہ اس وقت سامنے آیا جب اندور انتظامیہ شہر کو بھکاریوں سے پاک بنانے کی مسلسل کوششوں میں مصروف ہے۔ شہر کی انتظامیہ نے ایک ایسا حکم جاری کیا تھا جس کے تحت بھیک دینے اور لینے والوں کے خلاف کارروائی کی بات کی گئی تھی۔اندور کی انتظامیہ کے اس حکم کے مطابق، اب شہر میں کوئی بھی شخص کسی بھکاری کو بھیک دینے کی صورت میں پولیس کارروائی کا شکار ہو گا۔ اس تازہ واقعے میں بھیک دینے والے شخص کی شناخت نہیں ہو سکی، جس کی وجہ سے پولیس نے اس معاملے میں ایک نامعلوم شخص کے خلاف کارروائی کی ہے۔ پولیس نے دو ایف آئی آر درج کی ہیں، ایک بھیک دینے والے شخص کے خلاف اور دوسری بھکاری کے خلاف۔یہ کارروائی ‘انسداد بھیک دستہ’ کے افسر کی شکایت پر کی گئی ہے، اور پولیس نے بی این ایس (بھارتیہ نیائے سنہیتا) کی دفعہ 223 کے تحت مقدمہ درج کیا ہے، جو کسی سرکاری حکم کے خلاف عمل کرنے پر لاگو ہوتا ہے۔
اندور انتظامیہ کا مقصد شہر کو بھکاریوں سے پاک بنانا ہے، جس کے تحت دسمبر 2024 میں ایک حکم جاری کیا گیا تھا جس میں بھیک دینے پر پابندی لگائی گئی تھی۔ اس حکم کی خلاف ورزی کرنے والوں کے خلاف کارروائی کرنے کا بھی ذکر کیا گیا تھا۔ انتظامیہ نے شہر بھر میں بیداری مہم بھی شروع کی تھی۔اندور میں بھیک دینے پر قانون کے مطابق دفعہ 223 کے تحت ایک سال کی سزا اور 2500 روپے تک جرمانہ عائد کیا جا سکتا ہے، یا پھر دونوں سزائیں دی جا سکتی ہیں۔ تازہ کیس میں پولیس کا کہنا ہے کہ ’’ہم نے دو افراد کے خلاف ایف آئی آر درج کی ہے، مگر ابھی تک کسی کی گرفتاری نہیں ہوئی ہے۔‘‘
یہ بات بھی قابل ذکر ہے کہ اندور میں بھیک دینے اور لینے کے خلاف یہ قانونی کارروائی یکم جنوری 2025 سے نافذ ہو چکی ہے۔ اسی ماہ، اندور کے ضلع مجسٹریٹ آشییش سنگھ نے عوام سے اپیل کی تھی کہ وہ بھیک نہ دیں اور اس سلسلے میں آگاہی پیدا کریں۔ ضلع مجسٹریٹ نے یہ بھی بتایا کہ حال ہی میں بھیک مانگنے والے ایک گروہ کا پردہ فاش کیا گیا ہے اور کئی بھکاریوں کی بازآبادکاری بھی کی گئی ہے۔اندور انتظامیہ کی یہ مہم شہر کو صاف ستھرا بنانے اور بھیک مانگنے کے مسئلے کو ختم کرنے کی ایک کوشش ہے، جس کا مقصد عوامی جگہوں پر بھیک مانگنے والوں کی موجودگی کو کم کرنا ہے۔
مہاراشٹر میں آرڈیننس فیکٹری میں دھماکہ، 8 افراد ہلاک، 7 زخمی
خیبرپختونخوا میں سینیٹ انتخابات،الیکشن کمیشن کو 60 دن میں فیصلے کا حکم
