بھارت میں شادیوں کے دوران کچھ نہ کچھ عجیب و غریب اور مضحکہ خیز واقعات پیش آنا معمول بن چکا ہے، اور حال ہی میں ایک ایسا واقعہ منظر عام پر آیا ہے جس میں دولہے نے دلہن کو پٹائی کر دی۔ یہ واقعہ بھارتی شہر اندور کے ایک گاؤں بنگنگا میں پیش آیا، جہاں شادی کی تقریب کے دوران اچانک بجلی چلی گئی اور پھر وہی ہوا جس کی کسی نے بھی توقع نہیں کی تھی۔
شادی کی تقریب میں دلہن کے اہل خانہ بارات کا انتظار کر رہے تھے۔ جیسے ہی دولہا ہیمنت کیتھواس بارات کے ساتھ انٹری دیتے ہیں، ان کا استقبال کیا جاتا ہے۔ تاہم، خوشی کا ماحول بہت جلد ٹوٹ گیا جب اچانک بجلی چلی گئی۔ اس پر دلہن والوں نے بجلی بحال کرنے کے لیے فوری طور پر متبادل انتظامات شروع کر دیے۔لیکن اس دوران دولہے اور باراتیوں کا پارہ ہائی ہو گیا، اور بات تلخ کلامی تک پہنچ گئی۔ دونوں طرف سے لفظوں کا تبادلہ اس قدر بڑھا کہ باراتیوں نے دلہن والوں پر حملہ کر دیا۔ ان کی جانب سے نہ صرف لفظی جنگ چھڑی بلکہ جسمانی تشدد بھی شروع ہو گیا ،پولیس کو واقعے کی اطلاع ملی اور وہ فوراً موقع پر پہنچ گئی، مگر تب تک بارات والے تقریب چھوڑ کر واپس جا چکے تھے۔
دلہن نے پولیس کو بتایا کہ اس کی شادی ہیمنت کیتھواس سے طے تھی اور بارات رات 10 بجے ان کے گھر پہنچی۔ دلہن کے اہل خانہ نے باراتیوں کا استقبال کیا اور انہیں کھانا کھلایا۔ مگر جب اچانک بجلی چلی گئی، تو اس کے بعد دولہا اور اس کے اہل خانہ نے ہنگامہ کھڑا کر دیا۔ دولہے کے گھر والوں نے تلخ کلامی کی اور پھر تشدد کا راستہ اپنایا۔ دلہن کے مطابق، دولہے اور اس کے گھر والوں نے نہ صرف اس پر بلکہ اس کے اہل خانہ اور درمیان میں مداخلت کرنے والوں پر بھی تشدد کیا، اور اس کے بعد شادی کو منسوخ کر کے واپس روانہ ہو گئے۔
