بل بورڈزپر جس سیاسی رہنما کی تصویر ہو اس کےخلاف مقدمہ درج کیا جائے،سندھ ہائیکورٹ

کراچی:سندھ ہائیکورٹ نے شہر سے سیاسی رہنماؤں کے سائن بورڈز اور ہورڈنگز ہٹانےکا حکم جاری کردیا۔

باغی ٹی وی: سندھ ہائیکورٹ میں عوامی مقامات پربل بورڈز اور ہورڈنگزپرپابندی کے کیس کی سماعت ہوئی جسٹس ندیم اختر کی سربراہی میں دو رکنی بینچ نے سماعت کی جس دوران کے ایم سی اور کنٹونمنٹ کے وکلا عدالت میں پیش ہوئے، عدالت نے وکلا سے کہا کہ یہ مہذب لوگوں کا شہر ہے یا جنگل، کراچی کو جنگل مت بنا ئیں، ہم شہر میں آنے والوں کو کیا بتانا چاہتے ہیں؟جائیں جا کر اپنی ذمہ داری پوری کریں-

کنٹونمنٹ کے وکیل نے مؤقف دیا کہ ہم کارروائی کررہے ہیں ان میں کچھ رکاوٹیں آرہی ہیں،عدالت نے اس مؤقف پر شدید برہمی کا اظہار کرتے ہوئے ریمارکس دیئے کہ اگر کام نہیں کرسکتے تو بند کردیں کنٹونمنٹ۔

بعد ازاں عدالت نے شہر سے سیاسی رہنماؤں کے سائن بورڈز اور ہورڈنگز ہٹانے کا حکم دیتے ہوئے کہا کہ الیکشن کمیشن اور شہری انتظامیہ سیاسی رہنماؤں کے خلاف کارروائی کرےبل بورڈزپر جس سیاسی رہنما کی تصویر ہو اس کےخلاف مقدمہ درج کیا جائے، عدالت عالیہ نے شہر بھر سے تمام بل بورڈز اور ہورڈنگز ہٹا کر 31 جنوری کو رپورٹ پیش کرنے کا حکم دیدیا۔