سیالکوٹ،باغی ٹی وی( بیوروچیف شاہد ریاض) نامور کالم نگار حامد علی خان کی صد سالہ یوم پیدائش پر چیمبر آف کامرس میں تقریب
تفصیل کے مطابق روزنامہ نوائے وقت کے معروف کالم نگار حامد علی خان کی صد سالہ یوم پیدائش کے موقع پر سیالکوٹ چیمبر آف کامرس اینڈ انڈسٹری میں خصوصی تقریب منعقد کی گئی۔ اس موقع پر مختلف شعبہ ہائے زندگی سے تعلق رکھنے والی نمایاں شخصیات نے شرکت کی اور ان کی خدمات کو شاندار الفاظ میں خراجِ تحسین پیش کیا۔
تقریب کے شرکاء میں صدر چیمبر آف کامرس محمد اکرام الحق، سینئر نائب صدر وسیم شہباز لودھی، سابق صدور میاں محمد ریاض، ملک محمد اشرف اعوان، خاور انور خواجہ، ڈاکٹر خرم انور خواجہ، اور دیگر معززین شامل تھے۔ حامد علی خان کے اہل خانہ، جن میں ان کے صاحبزادگان زاہد علی خان، عابد علی خان، اور بیٹی مریم خاتون شامل تھیں، نے بھی تقریب میں شرکت کی۔
مقررین نے حامد علی خان کی دبنگ صحافت کو سراہتے ہوئے کہا کہ انہوں نے سیالکوٹ کے مسائل اور عوامی حقوق کے لیے بے خوف ہو کر قلم کا استعمال کیا۔ ان کے بے باک اندازِ تحریر نے حکمرانوں کو تنقید کے نشتر کا سامنا کرنے پر مجبور کیا۔ ان کی خدمات پر بات کرتے ہوئے کہا گیا کہ وہ سیالکوٹ نامہ اور کرکٹ نامہ جیسے مقبول کالمز کے ذریعے عوام کی آواز بنے۔
مقررین نے مزید کہا کہ حامد علی خان کو علامہ اقبال سے خاص لگاؤ تھا اور وہ اپنے کالمز میں اقبال کے اشعار کا حوالہ ضرور دیتے تھے، جس سے ان کی فکر اور ادبی شغف کا اندازہ ہوتا ہے۔
تقریب کے اختتام پر حامد علی خان کی یاد میں صدسالہ یوم پیدائش کا کیک کاٹا گیا اور ان کی خدمات کو یاد کرتے ہوئے دعائیہ کلمات کہے گئے۔ یہ تقریب سیالکوٹ کے ادبی اور سماجی حلقوں کے لیے ایک یادگار لمحہ ثابت ہوئی۔
