ممتاز حیدر
اسلام آباد: چیئرپرسن بینظیر انکم سپورٹ پروگرام (بی آئی ایس پی) سینیٹر روبینہ خالد نے سال 2025 کے آغاز پر مستحق خواتین کے لئے ایک اہم اعلان کیا ہے۔ انہوں نے کہا کہ جنوری 2025 سے بی آئی ایس پی کے تحت فراہم کی جانے والی بینظیر کفالت پروگرام کی سہہ ماہی قسط کی رقم میں اضافہ کیا گیا ہے۔ اب یہ رقم 10,500 روپے سے بڑھا کر 13,500 روپے کر دی گئی ہے تاکہ مستحق افراد کی معاشی حالت بہتر ہو سکے۔
سینیٹر روبینہ خالد نے کہا کہ یہ سال بی آئی ایس پی کی طرف سے بینظیر ہنر مند پروگرام کے لیے مخصوص کیا گیا ہے۔ ان کا کہنا تھا کہ یہ پروگرام خواتین اور پسماندہ طبقات کے لیے ایک اہم قدم ثابت ہو گا کیونکہ اس کے ذریعے وہ خود اپنے روزگار کے مواقع پیدا کر سکیں گے اور اپنے پیروں پر کھڑے ہو کر معاشی خود کفالت حاصل کر سکیں گے۔ سینیٹر نے مزید کہا کہ "ہم اس سال بھی ایمانداری کے ساتھ پسماندہ طبقات کی خدمت کا کام جاری رکھیں گے اور ہر ممکن طریقے سے ان کی زندگیوں میں بہتری لانے کی کوشش کریں گے۔”
سال نو 2025 کی مبارکباد دیتے ہوئے سینیٹر روبینہ خالد نے کہا کہ بی آئی ایس پی کی پوری ٹیم پاکستان کے تمام شہریوں کو نیا سال خوشی اور کامیابی کی دعا دیتی ہے۔ "ہماری کوشش ہوگی کہ ہم اپنے پروگرامز کی مدد سے ہر پاکستانی کے لئے ترقی اور خوشحالی کے دروازے کھولیں۔”اس موقع پر سینیٹر روبینہ خالد نے بی آئی ایس پی کے سیکرٹری عامر علی احمد، ایڈیشنل سیکرٹری ڈاکٹر طاہر نور اور ادارے کے دیگر افسران اور عملے کے ہمراہ نیا سال کا کیک بھی کاٹا۔ یہ ایک خوشگوار اور علامتی لمحہ تھا جس میں بی آئی ایس پی کے تمام ممبران نے مل کر نئے سال کا خیرمقدم کیا اور اپنے عزم کا اعادہ کیا کہ وہ مستحق افراد کے لیے اپنے کام میں مزید تیزی اور محنت سے کام کریں گے۔
اداکارہ سلمیٰ ظفر عاصم نے شوہر کو دوسری شادی کی اجازت کیوں دی ؟
