سوشل میڈیا پر منفی پروپیگنڈا کرنے کے الزام میں جوائنٹ انویسٹی گیشن ٹیم (جے آئی ٹی) نے پاکستان تحریک انصاف (پی ٹی آئی) کے رہنماؤں عمر ایوب اور علیمہ خان کو طلب کرلیا ہے۔ ذرائع کے مطابق، جے آئی ٹی نے پی ٹی آئی کے دونوں رہنماؤں کو طلبی کے نوٹس جاری کردیئے ہیں۔ علیمہ خان کو آج 12 مارچ کو پیش ہونے کی ہدایت کی گئی ہے، جبکہ عمر ایوب کو 13 مارچ کو پیش ہونے کا نوٹس جاری کیا گیا ہے۔
ذرائع کا کہنا ہے کہ جے آئی ٹی کے پاس ان رہنماؤں کے خلاف شواہد موجود ہیں جن کی بنیاد پر انہیں طلب کیا گیا ہے۔ اس تحقیقات کے تحت ان پر الزام ہے کہ انہوں نے سوشل میڈیا پر جھوٹ اور منفی پروپیگنڈا پھیلایا جس سے عوامی جذبات کو متاثر کیا۔وفاقی حکومت کی جانب سے تشکیل دی گئی جے آئی ٹی کی سربراہی اسلام آباد پولیس کے آئی جی کر رہے ہیں۔ یہ جے آئی ٹی الیکٹرانک جرائم کی روک تھام کے ایکٹ 2016ء کے تحت تشکیل دی گئی ہے، جس کا مقصد سوشل میڈیا اور دیگر الیکٹرانک ذرائع پر ہونے والے جرائم کی تحقیقات اور ان کی روک تھام کرنا ہے۔
یہ پیش رفت سیاسی حلقوں میں اہمیت اختیار کر گئی ہے اور اس کے اثرات آئندہ دنوں میں دیکھے جا سکتے ہیں۔
