بہاولپور: زیادتی کے بعد تیزاب گردی،لڑکی زندگی اور موت کی کشمکش میں مبتلا، مرکزی ملزم گرفتار

اوچ شریف ،باغی ٹی وی (نامہ نگارحبیب خان )بہاولپور میں لڑکی سے زیادتی اور تیزاب گردی کا واقعہ، مرکزی ملزم گرفتار

تفصیل کے مطابق بہاولپور میں اجتماعی زیادتی اور تیزاب پھینکنے کے واقعے میں ملوث مرکزی ملزم غفران عرف ہارون کو پولیس نے گرفتار کر لیا ہے۔ 24 سالہ متاثرہ لڑکی کو نوکری کا جھانسہ دے کر زیادتی کا نشانہ بنایا گیا۔ پولیس ذرائع کے مطابق گرفتار ملزمان سے تفتیش جاری ہے اور میڈیکل رپورٹس کی روشنی میں مقدمے میں مزید دفعات شامل کی جائیں گی۔

ہسپتال انتظامیہ کے مطابق متاثرہ لڑکی کی حالت تشویشناک ہے، اور دونوں گردے فیل ہونے کی وجہ سے وہ آئی سی یو میں زیر علاج ہے۔ متاثرہ کے اہل خانہ کا کہنا ہے کہ زیادتی کے بعد ملزم نے لڑکی کے چہرے، جسم اور ٹانگوں پر تیزاب پھینک دیا۔

تحقیقات سے یہ بھی انکشاف ہوا ہے کہ ملزم غفران عرف ہارون مختلف ناموں سے تعارف کروا کر لڑکیوں کو آن لائن بزنس اور بیرونِ ملک نوکریوں کے جھانسے میں پھنساتا تھا۔