ڈاکٹرغلام مصطفی بڈانی
اوچ شریف (باغی ٹی وی نامہ نگار حبیب خان)ڈپٹی کمشنر بہاولپور ڈاکٹر فرحان فاروق کے حکم پر ٹینکی گیٹ سے سیٹلائٹ ٹاؤن قبرستان کے گیٹ تک ٹف ٹائل بچھانے کا اہم منصوبہ مکمل کر لیا گیا ہے۔ اس منصوبے کے لیے صوبائی پارلیمانی سیکرٹری صاحبزادہ محمد گزین خان عباسی ایم پی اے نے گرانٹ مختص کی تھی۔ تاہم، گزشتہ چھ ماہ کے دوران محکمہ پبلک ہیلتھ انجینئرنگ کی جانب سے دو مرتبہ ٹھیکیدار کو اس منصوبے پر کام کرنے سے روک دیا گیا تھا، جس سے علاقے کے باشندگان کو شدید مشکلات کا سامنا تھا۔
اس مسئلے کے حل کے لیے مدیر روزنامہ احمد پور شرقیہ احسان احمد سحر نے سابق کونسلر حاجی فدا حسین جٹھول اور روزنامہ نوائے احمد پور شرقیہ کے نوجوان نمائندے ملک محمد سجاد کے ہمراہ ڈپٹی کمشنر بہاولپور کے دفتر میں ملاقات کی۔ انہوں نے ڈپٹی کمشنر کو سیٹلائٹ ٹاؤن اور اس کے نواحی علاقوں کے باشندگان کو قبرستان میں اپنی میتوں کو لے جانے میں درپیش مشکلات اور محکمہ پبلک ہیلتھ انجینئرنگ کی بے حسی سے آگاہ کیا۔
ڈپٹی کمشنر ڈاکٹر فرحان فاروق نے صورتحال کا فوری نوٹس لیتے ہوئے اسسٹنٹ کمشنر محمد نوید حیدر کو فون کال کر کے اس عوامی مسئلے کو ترجیحی بنیادوں پر حل کرنے کی ہدایت کی۔ چنانچہ، اسسٹنٹ کمشنر محمد نوید حیدر کی خصوصی دلچسپی اور مداخلت سے یہ معاملہ بخوبی حل ہو گیا اور ٹف ٹائل کی تنصیب کا کام پایۂ تکمیل کو پہنچا۔
چیف ایڈیٹر احسان احمد سحر اور سیٹلائٹ ٹاؤن کے باشندگان نے قبرستان سیٹلائٹ ٹاؤن کے گیٹ تک ٹف ٹائل بچھانے کا صاحبزادہ محمد گزین خان عباسی ایم پی اے کا منصوبہ بطریق احسن مکمل کرانے پر ڈپٹی کمشنر ڈاکٹر فرحان فاروق اور اسسٹنٹ کمشنر محمد نوید حیدر سے دلی اظہار تشکر کیا ہے۔
