پشاور (باغی ٹی وی رپورٹ) کمشنر پشاور ڈویژن ریاض خان محسود نے ڈینگی وائرس کی روک تھام کے لیے خود میدان میں نکلنے کا اعلان کیا ہے اور پشاور ڈویژن کے تمام اضلاع کے ڈپٹی کمشنرز اور ڈسٹرکٹ ہیلتھ آفیسرز کو ڈینگی ایکشن پلان 2024 پر فوری عمل درآمد کے احکامات جاری کیے ہیں۔
انہوں نے 72 گھنٹوں میں نتیجہ خیز اقدامات کرنے، حساس مقامات پر میڈیکل کیمپس قائم کرنے، ضروری ادویات کی فراہمی، اینٹی ڈینگی اسپرے کی مہم کو تین اوقات میں مکمل کرنے اور ہسپتالوں میں زیادہ سے زیادہ بیڈز مختص کرنے کے احکامات دیے ہیں۔
عطائی ڈاکٹروں کی جانب سے ڈینگی مریضوں کو غیر ضروری اینٹی بایوٹکس ادویات دینے کی شکایات پر بھی سخت نوٹس لیتے ہوئے، تمام اضلاع میں عطائی ڈاکٹروں کے خلاف کارروائی کے احکامات جاری کیے گئے ہیں۔
کمشنر ریاض خان محسود کی زیر صدارت ہونے والے اجلاس میں پشاور ڈویژن کے تمام پانچ اضلاع، پشاور، نوشہرہ، چارسدہ، مہمند اور خیبر کے ڈپٹی کمشنرز اور دیگر متعلقہ حکام نے شرکت کی۔ اجلاس میں پشاور ڈویژن میں ڈینگی کی صورتحال اور اب تک کیے گئے اقدامات پر تفصیلی بریفنگ دی گئی۔
ریاض خان محسود نے مزید کہا کہ اکتوبر کے مہینے میں درجہ حرارت میں کمی کے ساتھ ڈینگی کیسز میں اضافے کا خدشہ ہے، لہٰذا ڈینگی ایکشن پلان کے تحت فوری اقدامات کو تیز کیا جائے اور یومیہ رپورٹ کمشنر آفس کو بھیجی جائے۔ انہوں نے غفلت کی صورت میں سخت تادیبی کارروائی کا انتباہ بھی دیا ہے۔
