ڈی جی خان: ٹیچنگ ہسپتال,کینٹن مافیا کی لوٹ مار، عوام کی جیبوں پر ڈاکہ، انتظامیہ خاموش

ڈیرہ غازی خان(باغی ٹی وی ،سٹی رپورٹرجواد اکبر) ٹیچنگ ہسپتال میں کینٹن مافیا کی لوٹ مار، عوام کی جیبوں پر ڈاکہ، انتظامیہ خاموش

تفصیل کے مطابق ڈیرہ غازی خان کے ٹیچنگ ہسپتال میں کینٹن کے نام پر عوام سے لوٹ مار کا سلسلہ زور و شور سے جاری ہے۔ ہسپتال میں تین مختلف مقامات پر کینٹن کھول کر اشیاء کی قیمتوں میں من مانا اضافہ کیا گیا ہے۔ کینٹن کے عملے نے عوام کو چمٹری اتارنے کا کوئی موقع نہیں چھوڑا، جہاں عام مارکیٹ قیمتوں سے کہیں زیادہ قیمتیں وصول کی جا رہی ہیں۔

ذرائع کے مطابق ہسپتال کے کینٹن میں 20 روپے کا بسکٹ 40 روپے میں بیچا جا رہا ہے جبکہ 80 سے 100 روپے میں ریگولر بوتلیں فروخت کی جا رہی ہیں جو مارکیٹ میں کہیں سستی ملتی ہیں۔ اس کے علاوہ منرل واٹر کے نام پر دو نمبر برانڈ کی بوتلیں بھی فروخت کی جا رہی ہیں، جنہیں اصل مصنوعات کے طور پر بیچا جا رہا ہے۔

یہ تمام صورتحال ہسپتال انتظامیہ کی خاموشی کے سبب چل رہی ہے جو اس مافیا کے ساتھ مک مکا کر کے خاموش تماشائی بنی ہوئی ہے۔ پنجاب فوڈ اتھارٹی اور پرائس کنٹرول مجسٹریٹ بھی اس معاملے سے غافل ہیں اور عوام کو اس لوٹ مار سے بچانے کے لیے کوئی اقدام نہیں کر رہے۔

مریضوں اور ان کے لواحقین نے کمشنر ڈیرہ غازی خان، ڈپٹی کمشنر، پنجاب فوڈ اتھارٹی اور پرائس کنٹرول مجسٹریٹ سے فوری طور پر اس مافیا کے خلاف کارروائی کرنے اور ہسپتال میں صفائی، معیار اور قیمتوں پر قابو پانے کا مطالبہ کیا ہے۔