ممبئی پولیس نے بانی پاکستان قائداعظم کے نواسے نُسلی واڈیا اور اہل خانہ کے خلاف جعلی دستاویزات کے الزام میں مقدمہ درج کر لیا
ممبئی پولیس نے بھارت کے معروف صنعت کار اور واڈیا گروپ کے چیئرمین نُسلی نیول واڈیا، ان کی اہلیہ، بیٹوں سمیت سات افراد کے خلاف جعلی دستاویزات کے استعمال کے الزام میں مقدمہ درج کیا ہے۔ یہ کارروائی فیرانی ہوٹلز پرائیویٹ لمیٹڈ کے ساتھ جاری ایک پرانے تنازع کے دوران مبینہ طور پر عدالت میں جھوٹی دستاویزات جمع کرانے پر عمل میں لائی گئی۔
پولیس کے مطابق یہ مقدمہ بوریولی کی میٹروپولیٹن مجسٹریٹ عدالت کے 20 ستمبر کے حکم پر درج کیا گیا۔ عدالت نے پولیس کو ہدایت دی تھی کہ نُسلی واڈیا، ان کی اہلیہ موریئن واڈیا، بیٹے نیس واڈیا اور جہانگیر واڈیا، کے ایف بھروچا، ایچ جے بامجی اور آر ای وانڈے والا کے خلاف دھوکہ دہی اور جعل سازی کے الزامات پر کارروائی کی جائے۔
یہ کیس ایک 30 سال پرانے ترقیاتی معاہدے سے جڑا ہے جو واڈیا خاندان اور فیرانی ہوٹلز کے درمیان ممبئی کے علاقے ملاڈ کی ایک زمین پر ہوا تھا۔ معاہدے کے مطابق زمین کی تعمیر و ترقی بلڈر کے راجہ گروپ کے ساتھ ہونی تھی اور اس کی مجموعی فروخت کا 12 فیصد حصہ واڈیا خاندان کو ملنا تھا،تاہم 2008 میں فریقین کے درمیان تنازعات شروع ہوئے اور معاملہ مختلف عدالتوں، بشمول بمبئی ہائی کورٹ اور بھارتی سپریم کورٹ تک جا پہنچا۔
فیرانی ہوٹلز کے سی ای او مہندر چندے نے پولیس کو شکایت دی تھی کہ 2010 میں واڈیا گروپ کے نمائندوں نے اس تجارتی تنازع کے دوران بمبئی ہائی کورٹ میں جعلی کاغذات جمع کرائے۔مہندر چندے کے مطابق انہوں نے پہلے 15 مارچ 2025 کو بگنگر نگر پولیس اور پھر 24 مارچ کو ممبئی پولیس کمشنر کو شکایت دی، تاہم کوئی کارروائی نہ ہونے پر وہ بوریولی کی عدالت سے رجوع پر مجبور ہوئے، جس کے بعد ایف آئی آر درج ہوئی۔
پولیس حکام کا کہنا ہے کہ معاملے کی تحقیقات جاری ہیں اور درجنوں صفحات پر مشتمل ریکارڈ کی تصدیق کے بعد ہی مزید کارروائی عمل میں لائی جائے گی۔یہ مقدمہ بھارتیہ نیائے سنہتا (BNS) کی مختلف دفعات کے تحت درج کیا گیا ہے جن میں دھوکہ دہی،جعل سازی،جعلی دستاویزات کا استعمال اور مجرمانہ سازش جیسے سنگین الزامات شامل ہیں۔
نیس واڈیا واڈیا گروپ کے وارث اور متعدد کمپنیوں کے ڈائریکٹر ہیں، جبکہ وہ انڈین پریمیئر لیگ (آئی پی ایل) کی ٹیم پنجاب کنگز کے شریک مالک بھی ہیں۔ ان کا نام ماضی میں بالی وُڈ اداکارہ پریتی زنٹا کے ساتھ تعلقات اور بعد ازاں تنازعات کے باعث خبروں میں بھی رہا ہے۔ذرائع کے مطابق اگر الزامات ثابت ہوئے تو یہ کیس بھارت کے ایک بڑے صنعت کار خاندان کے لیے نہ صرف قانونی مشکلات بلکہ ساکھ کو نقصان پہنچانے کا سبب بن سکتا ہے۔
