ڈاکٹرغلام مصطفی بڈانی
سرگودھا/ڈسکہ (باغی ٹی وی، نامہ نگار ملک شاہنواز جالپ، ملک عمران)بھارتی جارحیت کے خلاف پاک فوج کی تاریخی فتح اور آپریشن بنیان المرصوص کی کامیابی پر ملک بھر کی طرح سرگودھا اور ڈسکہ میں بھی تقریبات منعقد کی گئیں، جن میں شہریوں، طالبات، وکلاء اور اساتذہ نے پاک فوج کے ساتھ بھرپور اظہارِ یکجہتی اور محبت کا مظاہرہ کیا۔
سرگودھا میں گورنمنٹ ایم سی گرلز ہائی اسکول سٹیلائٹ ٹاؤن میں اسمبلی کے دوران طالبات نے "پاک فوج زندہ باد” کے نعرے لگائے اور ہاتھوں میں پلے کارڈز اٹھا کر اپنی افواج سے اظہارِ وفا کیا۔ اسکول کی ہیڈ مسٹریس میڈم مہناز گیلانی نے اس موقع پر خطاب کرتے ہوئے کہا کہ پاکستانی قوم اپنے بہادر سپاہیوں کو سلوٹ کرتی ہے جنہوں نے دشمن کو منہ توڑ جواب دے کر یہ ثابت کر دیا کہ ہماری امن کی پالیسی کو کمزوری نہ سمجھا جائے۔ اُنہوں نے کہا کہ ہماری افواج نے بھارت کے دفاعی نظام کو قبرستان میں تبدیل کر کے دشمن کے تکبر کو خاک میں ملا دیا۔
ادھر ڈسکہ بار ایسوسی ایشن کی جانب سے فتح کی خوشی میں خصوصی تقریب کا انعقاد کیا گیا، جس میں صدر بار اور وکلاء نے پرچم کشائی کی، پاک فوج زندہ باد کے فلک شگاف نعرے لگائے، مٹھائی تقسیم کی گئی اور وکلاء پر گل پاشی کی گئی۔ وکلاء رہنماؤں نے اپنے خطاب میں کہا کہ اس تاریخی فتح نے دنیا بھر میں پاکستان کی عزت و وقار کو بلند کیا ہے اور پوری قوم افواج پاکستان کی شجاعت پر فخر کرتی ہے۔
ان تقریبات نے ثابت کیا کہ وطنِ عزیز کا ہر شہری، خواہ وہ طالب علم ہو، وکیل یا استاد، اپنی فوج کے ساتھ شانہ بشانہ کھڑا ہے اور ملکی دفاع کے لیے پوری قوم متحد ہے۔
