چیئرمین سینیٹ دورہ بحرین پر، بحرین کے بادشاہ سمیت اعلیٰ حکام سے ملاقات، کیا ہوئی بات؟
باغی ٹی وی کی رپورٹ کے مطابق چیئرمین سینیٹ محمد صادق سنجرانی نے بحرین کے بادشاہ حماد بن عیسیٰ الخلیفہ، شوریٰ کونسل کے چیئرمین علی بن الصالح اور بحرین کے وزیر داخلہ سے ملاقاتیں کیں۔
سینیٹ سے جاری اعلامیہ کے مطابق ان ملاقاتوں میں چیئرمین سینیٹ کے ہمراہ سینیٹرز فدامحمد، مرزا محمد آفریدی، سجاد حسین طوری، حافظ عبدالکریم، منظور کاکڑ، عابد عظیم، کیشو بائی اور کلثوم پروین بھی موجود تھیں۔ بحرین کی شوریٰ کونسل کے چیئرمین سے ملاقات میں چیئرمین سینیٹ نے دو طرفہ پارلیمانی روابط اور وفود کے تبادلوں میں تیزی لانے پر زور دیا۔
چیئرمین سینیٹ صادق سنجرانی نے کہا کہ پاکستان بحرین کے ساتھ اپنے دو طرفہ تعلقات کو انتہائی قدر کی نگاہ سے دیکھتا ہے اور ہماری خواہش ہے کہ ان دوطرفہ تعلقات کو کثیر الجہتی شعبوں میں وسعت دی جائے۔ پارلیمانی وفود کے تبادلوں میں تیزی لانے سے عوام کو مزید قریب لانے میں مدد ملے گی اور تعاون کیلئے نئی راہیں ہموار ہو نگی۔
چیئرمین سینیٹ نے او آئی سی اور انسانی حقوق کونسل جنیوا کے پلیٹ فارمز پر کشمیر کے مسئلے پر بحرین کی حمایت کو سراہا اور شکریہ ادا کیا۔ چیئرمین سینیٹ نے کہا کہ دونوں ملکوں کے درمیان بین الاقوامی فورمز پر بہترین تعاون دیکھنے میں آیا ہے ،مقبوضہ کشمیر میں بھارتی افواج کے ہاتھوں انسانی حقوق کی خلاف ورزیوں اور علاقے میں سات ماہ طویل کرفیو کے باعث معصوم اور نہتے کشمیریوں کی زندگی عذاب میں مبتلا ہے۔
پاکستانی وفد نے بحرین کے بادشاہ حماد بن عیسیٰ الخلیفہ سے بھی ملاقات کی اور دوطرفہ باہمی دلچسپی کے امور کے علاوہ اہم معاملات پر بھی تبادلہ خیال کیا۔ چیئرمین سینیٹ نے کہا کہ اعلیٰ سطح پر سیاسی روابط تعلقات کو مزید مستحکم کرنے میں مدد گار ثابت ہونگے اور دونوں ملکوں کو مختلف شعبوں میں باہمی تعاون کو مزید فروغ دینے کیلئے اقدامات اٹھانے ہونگے۔
بحرین کے بادشاہ نے خطے کے امن ترقی اور سلامتی کیلئے پاکستان کی کاوشوں کو سراہا۔ انہوں نے سیاسی، سفارتی اور سماجی سطح پر دو طرفہ تعلقات کو مزید فروغ دینے پر زور دیا۔ وفد نے بحرین کے وزیر داخلہ سے بھی ملاقات کی۔ ملاقات میں باہمی دلچسپی کے امور سمیت دو طرفہ اہمیت کے امور پر تبادلہ خیال کیا۔
https://twitter.com/SenatePakistan/status/1230149301394976769
قبل ازیں چیئرمین سینیٹ محمد صادق سنجرانی کی سربراہی میں سینیٹ کا وفدچار روزہ سرکاری دورے پر بحرین پہنچا تو ائر پورٹ پر بحرین کی شوری کونسل کے چیئرمین علی بن صالح الصالح نے وفد کا استقبال کیا۔
واضح رہے کہ چیئرمین سینیٹ محمد صادق سنجرانی نے تقریباً چودہ ماہ کے بعد کسی بھی ملک پہلا سرکاری دورہ کیا۔ گزشتہ ایک سال زائد عرصہ سے چیئرمین سینیٹ نے کوئی بھی غیر ملکی دورہ نہیں کیا۔ چیئرمین سینیٹ کے خود اختیار کردہ بچت اقدامات کے تحت بیرون ملک دورے کم کئے گئے ہیں،
چیئرمین سینیٹ صادق سنجرانی آخری مرتبہ 18تا 22دسمبر2018 سعودی عرب دورے پر گئے تھے۔ بحرین دورے کا مقصد پارلیمانی تعاون کو فروغ دینا اور باہمی روابط کو فروغ دینا ہے۔ چیئرمین سینیٹ نے کہا کہ انکا دوروں پر نہ جانے کا مقصد قومی خزانے پر بوجھ کو کم کرنا ہے، اس دورے کی دعوت بحرین کی شوری کونسل کے چئرمین نے دی ہے اور اس میں سینیٹ پر بوجھ نہیں پڑے گا۔
