سرگودھا،باغی ٹی وی( نامہ نگارملک شاہ نواز جالپ)نگران وزیراعلیٰ پنجاب محسن نقوی سے پنجاب کے 25 اضلاع کے چیمبرز آف کامرس اینڈ انڈسٹریز اورتاجر تنظیموں کے نمائندہ وفد نے ملاقات کی۔وفاقی وزیرخزانہ اسحاق ڈار اسلام آباد سے ویڈیولنک کے ذریعے شریک ہوئے۔3گھنٹے طویل ملاقات میں صنعتکاروں اور تاجر برادری کے صدور اور عہدیداران نے مسائل، تجاویز اور سفارشات پیش کیں۔وزیراعلیٰ محسن نقوی نے تمام مسائل او رتجاویز کو نوٹ کیا اور قابل عمل تجاویز کے حل کی یقین دہانی کرائی۔وفاقی وزارت خزانہ کی معاونت سے ترسیلات زرسے متعلقہ ایشوز کے حل کیلئے خصوصی سیل بنایا جائے گا۔نئی صنعتیں لگانے اورنیا کاروبار شروع کرنے کیلئے این اوسیز کے اجراء کیلئے ون ونڈو سہولت فراہم کی جائے گی۔ وزیراعلیٰ محسن نقوی نے انڈسٹریز ڈیپارٹمنٹ میں تاجروں او رصنعتکارو ں کیلئے مسائل کے حل کیلئے خصوصی سیل قائم کرنے کااعلان کرتے ہوئے کہا کہ 2روز میں خصوصی سیل قائم کردیا جائے گا،صنعتکاروں کے مسائل ترجیحی بنیادوں پر حل کریں گے۔صنعت لگانے کیلئے مختلف محکموں کے این اوسیز کے پرانے نظام کو یکسر بدلیں گے۔ نئی انڈسٹریز کو 30 روز کے اندر ون ونڈو آپریشن کے ذریعے این او سیز دئیے جائیں گے۔ ٹیکسٹائل انڈسٹریز اوراپٹما عہدیداروں نے پنجاب میں کپاس کی ریکارڈ فصل پر نگران وزیراعلیٰ اور ان کی ٹیم کی کارکردگی کوسراہا۔وزیراعلیٰ محسن نقوی نے کہا کہ تاجر اور صنعتکار ملکی معیشت کیلئے ریڑھ کی ہڈی کی حیثیت رکھتے ہیں۔ تجارتی سرگرمیوں کے فروغ کیلئے کار وبار میں آسانیاں پیدا کرنا چاہتے ہیں۔ تاجر اور صنعتکار برادری کی قابل عمل تجاویز پر ضرور غور کیاجائے گا۔ صوبائی سطح پر تاجروں کے مسائل حل کرنے کیلئے ٹیم کو متحرک کردیا گیا۔ انہوں نے کہا کہ صوبائی وزیر صنعت ایس ایم تنویر کو صنعتکاروں اورتاجروں کے مسائل کے حل کیلئے ذمہ داری دی ہے۔وفاقی وزیرخزانہ اسحاق ڈار نے کہا کہ مشکل وقت اور آزمائشیں گزرنے والی ہیں، پاکستان بہتری کی طرف گامزن ہے۔ پاکستان ڈیفالٹ نہیں کرے گا، بیرونی ادائیگیوں میں ایک دن کی تاخیر نہیں کی گئی۔ تاجروں اور صنعتکارو ں کوایک پلیٹ فارم پر اکٹھا کرنا خوش آئنداو رقابل تحسین ہے۔اس موقعہ پر سرگودھا چیمبر آف کامرس اینڈ انڈسڑی کے صدر ساجد حسین تارڑ نے وزیراعلی کو سرگودھا بھلوال روڈ کی تعمیر و توسیع کے منصوبے سے آکاہ گیا ۔ ملاقات میں رحیم یار خان اور لاہور میں سندر انڈسٹریل اسٹیٹس کی روڈز کی کشادگی،سرگودھا بھلوال روڈ کی تعمیر و توسیع کے منصوبے اورفورٹ منرو سٹیل برج کے فیز ون او رفیز تھری کی تکمیل کیلئے اقدامات پر اتفاق کیاگیا۔غازی یونیورسٹی کی سولر لائزیشن کیلئے 470ملین کے فنڈز جاری ہوں گے۔ڈیرہ غازی خان سے کوئٹہ روڈ اورراجن پورروڈ کی تعمیر ومرمت اور بحالی کی جائے گی۔ساہیوال میں انڈسٹریل سٹیٹ ٹو کے قیام پر غور کیاگیا۔اس موقع پر صوبائی وزراء ایس ایم تنویر، عامر میر، اظفر علی ناصر،منصور قادر، ابراہیم حسن مراد، مشیر وہاب ریاض، چیف سیکرٹری، انسپکٹرجنرل پولیس، سیکرٹری صنعت او رمتعلقہ حکام کے علاوہ اپٹما کے گروپ لیڈر گوہر اعجاز، انوار غنی، فواد مختار، چیمبرز آف کامرس اینڈ انڈسٹریز،سمال ٹریڈرز اینڈ سمال انڈسٹریز،فلور ملز، رائس ملز، ہارڈ ویئر مرچنٹ ایسوسی ایشن اوردیگر ایسوسی ایشنز کے صدور اور عہدیداران بھی اس موقع پر موجود تھے۔
Leave a reply
