آئی سی سی چیمپئنز ٹرافی کے دوسرے سیمی فائنل میں جنوبی افریقا کی ٹیم خود پر سے ‘چوکرز’ کا ٹیگ ہٹانے میں ناکام رہی اور نیوزی لینڈ کے ہاتھوں 50 رنز سے شکست کھا گئی۔ یہ میچ لاہور کے قذافی اسٹیڈیم میں کھیلا گیا، جہاں نیوزی لینڈ نے ٹاس جیت کر پہلے بیٹنگ کرنے کا فیصلہ کیا۔
نیوزی لینڈ نے پہلے کھیلتے ہوئے 50 اوورز میں 6 وکٹوں کے نقصان پر 362 رنز بنائے۔ راچن رویندرا اور کین ولیمسن نے شاندار سنچریاں اسکور کیں اور دوسری وکٹ کے لیے 164 رنز کی قیمتی شراکت قائم کی۔راچن رویندرا نے 108 رنز کی دلکش اننگز کھیلی جس میں ایک چھکا اور 13 چوکے شامل تھے، جبکہ کین ولیمسن نے 102 رنز بنائے، جس میں 2 چھکے اور 10 چوکے شامل تھے۔ ان کے علاوہ ڈیرل مچل نے 49 اور گلین فلپس نے بھی 49 رنز کی ناقابل شکست اننگز کھیلی۔
363 رنز کے تعاقب میں جنوبی افریقا کی ٹیم 50 اوورز میں 9 وکٹوں کے نقصان پر 312 رنز بناسکی۔ ڈیوڈ ملر نے شاندار بیٹنگ کرتے ہوئے 67 گیندوں پر 100 رنز کی ناقابل شکست اننگز کھیلی لیکن اپنی ٹیم کو فتح نہ دلا سکے۔ملر کے علاوہ وین ڈر ڈوسین نے 69 اور کپتان ٹیمبا باؤما نے 56 رنز کی اننگز کھیلی۔ ہینرچ کلاسن 3 اور ایڈن مارکرم 31 رنز بنا کر آؤٹ ہوئے۔نیوزی لینڈ کی جانب سے مچل سینٹنر نے 3، گلین فلپس نے 2 اور میٹ ہنری نے بھی 2 کھلاڑیوں کو آؤٹ کیا۔
واضح رہے کہ بھارت نے پہلے سیمی فائنل میں آسٹریلیا کو شکست دے کر فائنل کے لیے کوالیفائی کرلیا تھا۔ چیمپئنز ٹرافی کا فائنل 9 مارچ بروز اتوار کو دبئی میں بھارت اور نیوزی لینڈ کے درمیان کھیلا جائے گا
