دہشتگردوں کیخلاف آپریشن میں شہید چاروں جوان سپردخاک

خیبر پختونخوا کے صوبائی دارالحکومت پشاور کے علاقے حسن خیل میں دہشتگردوں کے خلاف آپریشن میں شہید ہونے والےچاروں جوانوں کو ان کے آبائی علاقوں میں سپردخاک کر دیا گیا ہے

ڈی جی آئی ایس پی آر کے مطابق شہداء کو ان کے آبائی علاقوں میں مکمل فوجی اعزاز کے ساتھ سپردِ خاک کیا گیا، پاک فوج کےسپاہی محمد ادریس شہید کو صوابی میں، بادام گل شہید کو کوہاٹ میں سپردِ خاک کیا گیا،سی ٹی ڈی خیبر پختون خوا کے سب انسپکٹر تاج میر شاہ شہید کو پشاور میں، اسسٹنٹ سب انسپکٹر محمد اکرم شہید کو مانسہرہ میں سپردِ خاک کیا گیا،شہداء کی نمازِ جنازہ اور تدفین میں سینئر حاضر سروس فوجی و پولیس افسران، فوجی جوانوں، شہداء کے لواحقین اور عمائدینِ علاقہ کی بڑی تعداد نے شرکت کی۔

واضح رہے کہ 10 جولائی کو پشاور کے علاقے حسن خیل میں فورسز کے ساتھ فائرنگ کے شدید تبادلے میں دہشت گرد کمانڈر عبدالرحیم سمیت 3 دہشت گرد ہلاک جبکہ 4 جوان شہید ہو گئے تھے،پشاور کے علاقے حسن خیل میں انتہائی مطلوب دہشت گرد کی موجودگی کی اطلاع پر مشترکہ انٹیلی جنس آپریشن کیا گیا تھا،حکومت نے دہشت گرد کمانڈر عبدالرحیم کے سر کی قیمت 60 لاکھ روپے مقرر کر رکھی تھی۔