لنڈی کوتل(باغی ٹی وی رپورٹ)چیف کلکٹر خیبر پختونخوا اپریزمنٹ خواجہ خرم نعیم نے طورخم بارڈر کے کسٹم اسٹیشن کا دورہ کیا اور وہاں کسٹم کلیئرنگ ایجنٹس کو درپیش مسائل پر تفصیلی بات چیت کی۔
طورخم کسٹم کلیئرنگ ایجنٹس ایسوسی ایشن کے صدر حاجی مجیب شینواری، ٹرانسپورٹ یونین کے صدر حاجی عظیم اللہ شینواری، سابق صدر اور سینئر کسٹم ایجنٹ حاجی ایمل شینواری سمیت دیگر نمایاں افراد نے ملاقات میں حصہ لیا۔
ملاقات کے دوران بارڈر پر گیٹ ان اور گیٹ آؤٹ کی موجودہ صورتحال، گاڑیوں کی کلیئرنس کے معاملات اور کسٹم ایجنٹس کو پیش آنے والے چیلنجز پر گفتگو کی گئی۔ چیف کلکٹر نے یقین دہانی کرائی کہ ان مسائل کے حل کے لیے مشترکہ کوششیں کی جائیں گی اور کسٹم حکام عملی اقدامات اٹھائیں گے تاکہ بارڈر پر تجارت کے عمل کو مزید بہتر بنایا جا سکے۔
کسٹم کلیئرنگ ایجنٹس نے چیف کلکٹر کے دورے کو سراہتے ہوئے ان کے اقدامات کا خیرمقدم کیا اور ان کا شکریہ ادا کیا۔ انہوں نے امید ظاہر کی کہ یہ دورہ تجارت کی بہتری اور مسائل کے حل میں معاون ثابت ہوگا۔
