چین نے پاکستان اور افغانستان کے درمیان طے پانے والے جنگ بندی معاہدے کا خیرمقدم کرتے ہوئے دونوں ممالک کے تعلقات میں بہتری اور استحکام کے لیے اپنا تعمیری کردار ادا کرنے کی یقین دہانی کرائی ہے۔
چینی خبر رساں ایجنسی ژنہوا کے مطابق وزارتِ خارجہ کے ترجمان گو جیاکُن نے پریس بریفنگ میں کہا کہ پاکستان اور افغانستان چین کے روایتی دوستانہ ہمسائے ہیں اور ایسے پڑوسی ہیں جنہیں الگ نہیں کیا جا سکتا۔انہوں نے کہا کہ چین جنگ بندی معاہدے کو سراہتا ہے اور ان تمام ممالک کی کوششوں کی تعریف کرتا ہے جنہوں نے اس معاہدے میں کردار ادا کیا۔ترجمان کے مطابق چین امید کرتا ہے کہ پاکستان اور افغانستان باہمی اختلافات کے حل، جامع اور دیرپا امن کے قیام کے لیے مذاکرات اور مشاورت کا سلسلہ جاری رکھیں گے۔
گو جیاکُن نے کہا کہ چین بین الاقوامی برادری کے ساتھ مل کر پاکستان اور افغانستان کے تعلقات میں بہتری اور ترقی کے لیے اپنا تعمیری کردار ادا کرنے کے لیے تیار ہے۔واضح رہے کہ قطر کی وزارتِ خارجہ کے مطابق پاکستان اور افغانستان نے قطر اور ترکیہ کی ثالثی میں فوری جنگ بندی پر اتفاق کیا ہے، جب کہ دونوں ممالک اس کے تسلسل کو یقینی بنانے کے لیے مذاکرات جاری رکھیں گے۔
پاکستانی وزیرِ دفاع خواجہ آصف نے بھی جنگ بندی کی تصدیق کرتے ہوئے بتایا کہ دونوں ممالک 25 اکتوبر کو استنبول میں مذاکرات کے ایک اور دور کا انعقاد کریں گے
