وزیرِاعظم شہباز شریف کا چینی وفد سے ملاقات: چینی شہریوں کے لئے مفت ویزہ کی سہولت کا اعلان
![chaina delagation](https://baaghitv.com/wp-content/uploads/2024/08/Aug-01-2024-20.35.03_WhatsApp-Image-2024-08-01-at-20.21.33-905x613.webp)
وزیرِاعظم پاکستان محمد شہباز شریف نے جمعرات کو چینی وفد سے ملاقات کے دوران کہا کہ چین اور پاکستان کے تعلقات لازوال ہیں اور چینی شہریوں کو مفت ویزہ کی سہولت دینے کا فیصلہ کیا ہے جس پر 14 اگست سے عملدرآمد ہوگا۔ملاقات میں نائب وزیرِاعظم و وزیرِ خارجہ اسحاق ڈار، وفاقی وزراء سید محسن نقوی، احسن اقبال، محمد اورنگزیب، احد خان چیمہ، معاون خصوصی طارق فاطمی، وزیرِاعظم کے کوآرڈینیٹر رانا احسان افضل، چینی سفیر جیانگ زائیڈونگ اور دیگر اعلیٰ حکام بھی موجود تھے۔ چینی وفد کی قیادت وانگ فوکانگ کر رہے تھے۔
وزیرِاعظم نے چینی وفد کو خوش آمدید کہتے ہوئے کہا کہ ان کا دورہ پاکستان انتہائی مفید ثابت ہوگا۔ انہوں نے کہا کہ دونوں ممالک کے درمیان صنعت،زراعت،معدنیات، آئی ٹی اور خصوصی اقتصادی زونز میں تعاون بڑھے گا اور مشترکہ منصوبوں کے ذریعے چینی صنعت کی پاکستان منتقلی فائدہ مند ثابت ہوگی۔شہباز شریف نے کہا کہ پاکستان میں چینی شہریوں کی فول پروف سکیورٹی کے لئے موثر اقدامات اٹھائے گئے ہیں اور بشام واقعہ میں ملوث افراد کو گرفتار کر لیا گیا ہے۔ انہوں نے کہا کہ پاکستان کی حکومت اور عوام اس واقعہ پر افسوس کا اظہار کرتے ہیں اور ملوث افراد کو قانون کے مطابق سزا دی جائے گی۔
انہوں نے کہا کہ چین پاکستان دوستی پہاڑوں سے اونچی اور سمندروں سے گہری ہے اور چین کے تعاون سے پاکستان نے اپنا سیٹلائٹ فضا میں بھیجا ہے۔ انہوں نے چینی قیادت صدر شی جن پنگ اور وزیرِاعظم لی چیانگ کا خصوصی شکریہ ادا کیا۔چینی وفد وزیرِاعظم شہباز شریف کے دورہ چین کے بعد پاکستان کے دورے پر ہے اور مختلف شعبوں میں تعاون اور اشتراک کے لئے اپنی آراء پیش کرے گا۔ 12 رکنی چینی وفد میں 10 مختلف وزارتوں کے نمائندے شامل ہیں۔ وفد پاکستان میں چینی سرمایہ کاری، سی پیک کے دوسرے مرحلے کے حوالے سے اشتراک و تعاون اور پاکستان کی برآمدات کے فروغ پر تجاویز دے گا۔چینی وفد انفارمیشن ٹیکنالوجی، زراعت، صنعت، سرمایہ کاری، توانائی، معدنیات اور کان کنی، خصوصی اقتصادی زونز اور مواصلات کے شعبوں میں تعاون کے فروغ پر تجاویز پیش کرے گا۔