اسلام آباد:چینی وزیراعظم لی کیانگ 14 سے17 اکتوبر کے دوران پاکستان کا دورہ کریں گے –
باغی ٹی وی : چینی وزیر اعظم لی کیانگ وزیر اعظم شہباز شریف کی دعوت پر پاکستان کا دورہ کر رہے ہیں وزیر اعظم لی کیانگ کے ہمراہ وزارت خارجہ ، تجارت،نیشنل ڈویلپمنٹ اینڈ ریفارم کمیشن اور چائنا انٹرنیشنل ڈویلپمنٹ کوآپریشن ایجنسی کے اعلی افسران اور وزرا شامل ہو ں گے –
وزیر اعظم محمد شہباز شریف اور وزیر اعظم لی کیانگ اپنے اپنے وفود کی قیادت کریں گے جہاں وہ پاک چین تعلقات کے تمام پہلوؤں بشمول اقتصادی اور تجارتی تعلقات اور سی پیک کے تحت تعاون پر جامع بات چیت کریں گے۔
دونوں فریقین علاقائی اور عالمی پیشرفت پر بھی بات کریں گے،چینی وزیراعظم صدر آصف علی زرداری سے ملاقات بھی کریں گے اور پارلیمانی رہنماؤں اور پاکستان کی اعلیٰ عسکری قیادت سے ملاقاتیں کریں گے وہ اسلام آباد میں منعقد ہونے والے شنگھائی تعاون تنظیم کے سربراہان حکومت کی کونسل کے اجلاس میں بھی شرکت کریں گے۔
وزیر اعظم لی کیانگ کا دورہ ، پاکستان اور چین کی جانب سے "آل ویدر اسٹریٹجک کوآپریٹو پارٹنرشپ” کی اہمیت کا اظہار ہے۔
واضح رہے کہ شنگھائی تعاون تنظیم کا سربراہی اجلاس 15 اور 16 اکتوبر کو اسلام آباد میں ہونے جا رہا ہے جس میں مختلف ممالک کے 200 وفود شرکت کریں گے۔
